(皇室婚宴 - 尖沙咀店) 我哋揀皇室婚宴嘅原因係呢間酒樓地點唔錯，喺尖沙咀區；而且場地環境靚，有啲歐陸式教堂的氣氛，唔似一般酒樓嘅感覺；而且價錢合理、比酒店平啲；最緊要係屋企人都鍾意，所以我哋揀咗呢間酒樓。 服務態度方面，負責人陳小姐同其他員工都跟得好足，而且非常有善。佢哋會話俾我哋知幾時要放啲婚宴用的物品去酒樓(包括婚宴佈置的材料)，又會主動幫我安排婚宴嘅細節，十分細心。婚宴當日，我哋原本搵咗兄弟姊妹幫手佈置場地，但我哋去到時，酒樓已經幫我哋set好咗個場，仲set得好靚！ 另外，員工又自動自覺幫我哋將啲回禮小禮物放在每個賓客嘅座位上。而婚宴後，員工亦自動幫我哋收好晒所以物品。美中不足之處，原訂預計在婚宴兩星期前可以睇到餐牌的設計，但係最終喺婚宴前幾日先睇到，時間太倉促了，想改design都改唔到了。另外，酒樓嘅package係包埋製作成長片段DVD，但酒樓製作嘅成長片段質素唔係幾好，design太簡單，想加其他嘢都唔可以，真係有啲失望！而且製成品喺婚宴前個多星期先收到，我哋想搵其他公司重新製作都已經唔夠時間。