一直以來都好鐘意日本，之前又試過去日本留學，一直都好想響日本影pre-wedding，而且我地預咗2016年3月尾去影，想影埋櫻花，最後搵到呢間。同我地接洽嘅Sales係台灣人Mike，其實未去婚展前我都響網站上同佢keep contact，佢一直都跟得好足，例如會主動問我地想去日本邊到，同埋想要一啲咩感覺嘅相。 我本身想去京都一啲古色古香嘅地方，Mike都有同我地建議，話3月係當地嘅旅遊旺季，遊人會較多，而且京都嘅路相對較窄，拍車較難，再加上佢地有向我地展示一啲樣本相，見到大阪同奈良都有同我心目中風格相近嘅地方，去到奈良仲可以同鹿合照，所以就轉咗去大阪同奈良。 佢地公司其實仲提供日本唔同地方，我地就想去關西地區，客人揀咗地點之後佢地就會幫客人安排行程，除咗大阪同奈良兩個公園，佢地仲安排咗我地去奈良若草山上影黃昏，當然佢地都會提出建議，點樣安排行程最順路。我地揀咗去大阪一個冇咁出名嘅公園入邊影，入面仲有間和室添！ 我地買嘅Package包咗一套和服同一套西服，分別上下午拍攝，風格亦都唔同，之後仲on top加咗夜景拍攝服務，所以可以揀攝影師。我地揀咗Hayato san，佢嘅風格較溫馨同warm，好鐘意。雖然攝影師係日本人，翻譯就係講英文，但因為我識少少日文，同埋佢嘅指示都好清晣，拍攝過程都算順利。而且攝影師為咗要攞個靚啲嘅角度，都唔介意爬落去湖入面啲石上面攞景。其實出發前我地已經講好哂我地嘅要求，例如老公想扮武士，佢地都安排好道具，完全影到我地心目中嘅風格出嚟。 拍攝有少許阻滯，主要係因為塞車，但無阻拍攝進度，為咗趕進度佢地都冇休息到，仲主動話可以再繼續拍，補咗啲其他shot，最後佢地嘅工作時數比預計多咗一個多小時添，而且仲執生能力高，因為當日去到我地發現櫻花唔算開得好靚，攝影師即時就地取材要我地轉做撐船，個效果都唔錯！ 不過可能因為風格問題，本身想佢幫我執個下巴尖啲，但最後執出嚟好奇怪咁，好在影嘅時候啲相打燈靚，角度自然，所以最後都係唔執，反而仲滿意。 另外我覺得影相時間再長啲會好啲，可以再影多啲，咁就可以多啲相揀。當日我地個午飯時間太長，響大阪個office換完妝再食飯，休息咗一陣先出發去奈良，結果去到奈良已經3點，雖然啲相都影到我地要求，working hour又比預算長咗，但休息時間太長，換完衫就響間店到呆坐，浪費咗啲時間。