我本身鐘意復古懷舊風，一上網就搵到呢間舖頭。佢地個studio響火炭，要by appointment上去試衫，我地主要透過Facebook Messenger溝通，佢地回覆訊息速度好快，亦都好禮貌，同埋網上有哂sample相，一開始同佢講咗要邊幾款，試身當日佢已經準備好哂畀我。 最初接觸佢果陣仲係細舖頭，只係賣美國50至80年代嘅二手古董婚紗，所以初期都唔係好多款，同埋就算岩款又未必有碼，所以最後買咗果件又唔係網上睇中果件，不過呢件都好鐘意，啲details位好細緻，同埋長袖都好靚。 細舖麻煩之處在於安排時間試身，但呢間個彈性都大，星期六日基本都安排到，不過每個時段就得一對新人。另外我地仲響到租埋所有西式男禮同爸爸媽媽衫，襯返整個場景vintage嘅風格，因為款式唔多，所以反而唔會太煩惱。雖然係咁，你知香港人都係鐘意有得選擇，所以款式可以多返啲，多元化啲會再好啲！