行婚展嘅時候，希臘女神同蒙娜麗莎兩間我哋都有睇過。希臘女神佢哋嘅sales態度都幾好，相對蒙娜麗莎嗰邊感覺就比較hard sell啲。希臘女神個sales又好努力咁度減啲嗰度又減啲好似好多優惠，又話張單係只係for我哋，最後我哋就join咗希臘女神一個prewedding同big day嘅package。 我哋個package已經係貴少少乜衫都可以揀嘅package黎，不過啲衫唔係太合我哋眼緣，都唔係太揀到自己鐘意嘅款式，而且quality一般。褂就要俾多啲錢先有得揀，不過褂款一向唔多，我哋都係揀到就算。不幸地我哋要影prewedding 嗰日落大雨，最後影studio景仲多過出去影。因為變咗好多studio裡面影，場景多咗，到揀相嘅時候就令你覺得好似款式多咗。除非好決絕，唔係你都會想每個場景留一兩張，所以最後到揀相嗰時我都加錢買多咗。不過最令我唔開心嘅係之前個sales一直好堅持話唔可以俾晒啲相，但到揀相嘅時候換咗另一個sales就話可以！佢話加錢就可以買晒啲相，但係加埋晒就仲貴過蒙娜麗莎可以包晒啲相嘅package！！如果當日我知道係咁嘅價錢，就可能影響我嘅選擇，所以覺得唔係好開心！另外揀相嘅sales態度都好pushy。 相嘅質素講真我哋覺得其實好一般，有啲相影咗出黎我哋直頭完全唔會要。不論係prewedding嘅相定係我外母後來睇返big day嘅相都唔係太滿意，尤其影相嘅角度有改善嘅空間，可能「抽高」啲會好啲。排版方面我哋來回comment過幾次去執先比較理想。 不過除咗堅持話無得攞晒啲相呢件事令我哋有啲失望之外，我哋覺得希臘女神個sales好多嘢都好體貼，唔介意你好多要求。嗰時我哋揀march in同婚宴中間播咩歌都好煩惱，佢就share啲歌俾我哋揀。同埋嗰時喺香港擺酒後1星期就要上大陸再擺酒，所以想可以快啲攞到當日嘅片同相。原本可能要2-3個月，但佢哋幾日後就趕好俾我。我好impress佢哋achieve到。