我哋影完prewedding之後，就覺得真係要刻意去搵返我哋想要嗰種感覺嘅wedding photo。之後喺婚展見到Miracle Wedding嘅相係自然風，就去咗了解多啲。攝影師阿龍（老闆）佢俾佢啲相同片我哋睇，我哋都覺得係我哋想要嘅嘢，所以就好快決定咗～不過唔知佢係咪好忙，所以有時之後聯絡唔係好覆，我都交晒俾我老公處理。 Big day當日我哋喺嘉利酒店出門，因為佢哋嘅房有海景。其實嗰朝我哋顧住影相，啲姊妹又比較奄尖，個個都要影相，外影over run咗好多！嗰日真係超級晒，我哋又影啲跳嘅相，我記得有一張相影咗好多次差不多十分鐘先成功，但佢都好有耐性。唯一覺得美中不足嘅係我哋喺教堂影嘅團體相，我老公副眼鏡好似戴咗黑超咁。如果攝影師留意到，早啲向我哋mention的話，我一定叫我老公即刻除咗佢～不過除此之外，啲相我哋都好滿意，係我哋想要嘅比較自然feel啲嘅相或者snapshot ～