之前有人同我提過Club One，我自己都有去吓啲介紹會。我見佢地場地佈置好靚，菜式配搭都幾好。因為我地會擺20圍，都想個場地有婚禮氣氛，Club One嘅場地佈置都好滿足到呢個條件。加上睇佢地服務好似都唔錯，big day會有專人跟住新娘，同埋啲音響都幾好，所以都好快揀佢地。 不過就算定咗揀ClubOne，我地開頭都猶豫到底揀K11、愉景新城定係銀灘。我地係8月擺酒，考慮到會係風季，銀灘就會有啲risky，同埋佢個到車輛好多限制，所以就無揀到。而K11我地就覺得場地空間有啲窄，擺16圍都已經好盡，雖然佢地啲員工好好服務，但我地要擺成20圍，所以最後就揀左愉景新城。 愉景新城個場地好闊落，可以擺到40圍，仲有兩間新娘房，細啲個間位置就方便啲，不過啲姊妹就唔夠位入哂去。地點都好方便，而且個環境好，都會就到住唔同地方嘅人，佢地又有預備shuttle係走嘅時候送啲賓客去到方便嘅地方落車。同埋我地好多賓客都有小朋友，愉景新城個邊剛好有好多小朋友野，club one個度都有空間俾小朋友走動同玩，就好適合。 場地同啲佈置擺設都好靚，雖然係要加錢整，但就方便好多，唔使班兄弟姊妹再去set up，我地淨係預備啲好基本嘅野就可以。我地覺得如果可以提供埋紅地氊就更好～ 佢地員工都幾好，我地講啲要求，佢地都會盡量跟足細節。唯獨係第一個接洽嘅職員就麻麻，態度唔多好，後來換左第二個就好好多，問好多野（例如係旅遊巴人數個啲安排），佢都可以好準確咁回應到。圍席嘅員工招呼就麻麻，唔知係咪因為係parttime，我地最後啲紅酒飲剩多過一半，先知原來佢地都無同賓客講到仲有好多酒可以添。不過跟住我果個員工就好好，會幫我打點一切，又會提我一陣要做咩，啲時間係點。食物都唔錯，外觀、份量同味道各樣都ok！我地覺得整體都唔錯，同埋可能因為我地揀個日都唔係啲咩旺日，所以個min pay都低啲！