因為喺Facebook見到廣告所以揀呢間酒店，睇到個廣告佢哋個場地有草地、露台餐廳，同埋個裝潢都係好英倫風，而我老公就係喺英國讀大學嘅，咁所以都會prefer英式啲嘅😌同時間我哋都有搵緊5間做比較，呢間就最靚，所以就揀咗呢間。

而我哋就喺四月揀咗幾日去問日子得唔得，咁啱幾日都有場，所以就去咗睇場。場地就同佢provide嘅相一樣都係咁靚，長方形場、18圍，最特別就係佢行英式婚禮，唔似普通酒樓，佢哋係provide set dinner(5至6個course)，而佢有個優點就係佢包咗三架旅遊巴來回金鐘到淺水灣，連交通都包埋真係好好，唔洗擔心。當咗訂之後特別之處就係佢哋嘅event sale會用email同我哋聯絡，唔係用whatsapp，但其實都好ok，因為佢覆email都覆得好快，所以唔洗擔心。仲記得bigday當日落雨，我哋其實想喺出面草地證婚，suppose兩點就要set場，如果仲落緊雨嘅話就要入返室內搞，但我一開始睇中呢個場地就係想要佢個草地同海景，好好彩兩點嗰陣咁啱天晴，咁我打算打比head waiter Kelvin同佢講可以繼續喺草地搞要去set場，點知一打過去Kelvin已經話我知已經set緊喇，真係令人好安心！

Kelvin仲要擔當埋拎裙尾嘅角色，不論聯絡、管理，一堆細節都由佢跟，真係好勁！同埋因為我訂咗200個小cupcake，想喺訂婚同reception嘅時候食，但就算啲姊妹幾努力咁叫啲賓客食都好，都淨咗三十幾個，咁姊妹們就好無助，Kelvin一望到佢哋個樣就主動幫佢哋諗解決方案，最後喺上甜品嗰陣就順便將嗰三十幾個cupcake派哂去，呢個應變方法真係好好😍

係菜色方面，我哋去試菜嗰陣個service同流程都好好，Kelvin仲會介紹哂四種紅、白酒，連背景、texture都講埋，上菜就會教我哋應該要食邊part先邊part後。有個位好細心就係我奶奶試個鮑魚就覺得偏鹹，Kelvin即刻mark返呢個menu上嘅adjustment，我以為我自己要再同Karen(event sale)講，點知第二日睇email Karen就話已經同Kelvin聯絡咗，已經做好adjustment，我覺得呢個位真係令人好放心！

最尾雖然個鮑魚都係偏鹹，但有幾個賓客同我講，話係佢哋飲過咁多次最好食嘅一餐，連一啲本身細食嘅女性朋友都將所有嘢食清哂，反映出個食物嘅質素好高，同埋個紅白酒好好飲！可惜嘅位就係個場係長方形，兩邊就要睇screen先睇到，因為我同我老公都有準備performance，坐兩側嘅賓客就要特登行出去先睇到，但so far個場都係有空間嘅唔會太逼。仲有！佢哋個新婚房真係好細！同埋你上網睇只會睇到weekend嘅package，但我係weekday搞，所以weekday嘅package係送多啲嘢，如果大家係weekday搞記得去問清楚！😌