其實都幾橋，我地決定結婚嗰陣已經係1、2月份，咁啱尖沙咀凱悅酒店2月16號有個婚姻諮詢日，我地就登記左。其實都有上網搵過幾間酒店嘅，其他大酒店、五星級嗰啲都有問。我地係佢地嘅婚姻諮詢日有去睇場，都覺得幾靚。嗰場唔係太大，我地擺10圍左右，嗰場嘅size都啱。同埋嗰陣一開始佢地有minimum charge，要擺15圍以上，我地擺唔到咁多，最後佢地都肯做俾我地。👏🏻 啲嘢食味道都OK，佢地仲送唔少嘢，同埋佢地嘅sales幾好，服務又OK。場地對我地嚟講都幾闊落，同埋幾靚，樓底好高，出面迎賓嘅地方又夠大，幾舒服。同埋佢地同出面尖沙嘴五星級酒店相比，算係比較新，佢地嗰場又係比較靚嘅。佢地好細心，本身佢地送左一間客房俾我地，不過我地upgrade到行政套房，佢地知道我地兩個未食嘢，就將夜晚擺酒嘅餸，由第一道到最尾一道，連埋甜品，完整兩份送上房俾我地食。🥳 房嘅質素幾好。其實我地出門係揀左另一間有海景嘅酒店，嗰間酒店開得比較耐，所以啲設備就舊啲。凱悅呢間就新淨啲，同埋舒服啲。間房有兩個洗手間，窗簾都係遙控嘅。設備仲好好多，職員服務又好好。我地本來係擺夜晚場嘅，一開始佢地話唔知中午會唔會有event，就話5點先可以交到場。之後佢地提早一個禮拜話我地知中午冇event，可以早啲交場。佢地亦都有同我地請嘅decoration公司聯絡，咁樣幫我地慳番好多時間。👍🏻👍🏻 嗰日3點個場已經佈置好，我地3點幾到酒店嘅時候，酒店經理同bridal assistant已經係到stand by。佢地仲俾我地去埋酒店嘅Chin Chin Bar，喺酒吧開門之前送左半個鐘頭俾我地係入面影相。酒店經理同bridal assistant就由3點嗰時開始一直serve我地。大致上都可以。不過我地擺酒個套餐係飲品、紅白酒無限供應，但我地見到啲賓客淨係飲左一半。唔知係咪佢地冇主動去加，而啲賓客又唔知係無限供應嘅，就慳住慳住飲，淨係飲左一杯橙汁咁，我覺得酒店呢一點就做得唔夠好喇。😅