我哋之前都有喺Facebook睇過兩間整佈置嘅公司，仲有一間係酒店介紹嘅，都有約出嚟見過睇咗啲相，但覺得啲款唔係好鍾意同埋價錢都比較貴啲。之後我朋友介紹咗梁品俾我哋，我哋睇咗都覺得幾好，之後約出嚟覺得價錢都合理，佢哋所有嘢都係可以tailor-made嘅，其他果兩間嘅款唔會有太大變動，最多係執下啲顏色同轉啲花，我哋就無咁鍾意，比較咗都覺得梁品係最好嘅😄，都會因為我哋要求特登去整屬於我哋嘅佈置，所以最後就成個場嘅佈置都交咗俾佢哋啦。由一開始開會到big day，搵親佢哋都覆得好快，even係凌晨一兩點都仲有人覆😁。佢哋都會關心我哋有咩未準備好，問我哋需唔需要幫手，我哋咁啱未搵到大妗姐同mc嗰啲，佢哋搞開婚禮識得啲人都會介紹俾我哋。佢哋無extra charge嘅，就純粹當朋友介紹邊個好俾我哋，最後佢哋refer收嘅價都唔會太貴，好似市價咁😆。期間我哋都起碼開咗三四次會，佢哋會send個draft嚟，跟住約多一次就同佢哋講返想改啲咩，我哋講嘅嘢佢都真係會抄低，之後佢哋又會再send second draft，我哋就喺whatsapp同佢講仲有咩要改，因為都比較少嘢改。最後我想睇下個稿唔同嘅效果，睇邊個會襯啲，佢哋都唔介意，三四個draft咁send俾我睇，同時出圖都好快。佢哋都唔會好快逼我俾final payment，無壓力嘅，我哋想改幾多就幾多，不過就最好唔好太炆水，因為都要製作，最後就喺big day前一個月全部confirm好。去到big day佢哋都有同酒店緊密聯繫，問咗酒店幾點可以俾個場佢哋，佢哋三四點已經到咗嗰度準備，差唔多六點整完，都好快手。個成品我哋都好滿意，賓客都有讚個logo好靚，我個initial S同我老公個initial P拼埋一齊可以變咗個心型咁，都好有心思❤️。不過希望佢哋唔好再凌晨覆客啦，唔想佢哋咁辛苦同大壓力，有啲客會好chur，但係如果有啲客唔介意嘅話佢哋遲啲覆都無所謂啦。同埋佢哋價錢嗰度有啲位可以寫得細微啲，有陣時佢哋show其他客整嘅佈置，有啲位係要另外加錢嘅，但因為未必知，之後先發現每個位係唔同價錢，列明清楚就最好啦，都保障佢哋自己，費事個客又會lur住佢哋咁。我覺得有自己諗法想點樣佈置個場地嘅新人就最適合搵佢哋啦，因為佢哋係要你俾個idea佢哋再開始砌，同返佢哋講你鍾意開顏色感覺咁，就唔會有template嘅感覺。👍