我哋係喺灣仔同九龍灣嘅婚展認識到梁品製作嘅，之後攞咗好多間嘅 catalogue 返屋企比較過，初初我哋都唔係揀佢哋嘅，但之後覺得佢哋好細心好有耐性咁同我哋解釋返成個流程，去到邊一個位先至要俾錢，就算未收我哋錢嗰陣都好有心機咁解釋俾我哋聽，唔會覺得我哋好煩咁，所以最後都係決定搵佢哋。

最大嘅感受就係佢哋收錢嗰part令到我好安心👍🏻。因為有好多公司係一開始就要收好多deposit或者收晒，但梁品就分開三次收。作為消費者，我覺得如果一早收晒可能就唔會用心幫我哋做。喺開會嘅過程中，佢哋都會因應客人嘅需要去更改，俾好多時間我哋去諗。又會跟住我哋嘅budget介紹俾我哋，同我哋講呢個價錢可以做到幾多，唔會好hard sell。

我哋用咗佢哋嘅場地佈置，包括backdrop、簽名檯、candy corner檯嗰啲。因為我哋想要Modern Chinese嘅風格，佢哋就拎咗好多作品俾我哋睇，搵埋sales同設計師同我哋傾，俾到啲好專業嘅意見我哋，令我哋好有信心。我哋都有搵到啲圖印出嚟俾佢哋參考。最初佢哋做嘅同我哋諗嘅都有啲出入，不過佢哋都願意聽我哋嘅意見去改。雖然佢哋喺contract有寫明最多大改同細改幾多次，但我諗我哋都應該超出咗。🙈 因為我哋好遲先俾屋企人睇，佢哋就覺得main backdrop嘅兩隻喜鵲唔係咁好，好似嘰嘰喳喳好嘈咁。原本應該係無得改嘅，但係同咗梁品嘅負責人講咗之後，佢哋都肯幫我哋改，好貼心。🥰 最後出嚟嘅效果我哋都好滿意，同埋好襯間酒店嘅裝飾，賓客都讚啲佈置好靚，問我哋用咗幾多錢，咁我哋都覺得值得嘅😊。但係主舞台有啲裝飾係用雙面膠紙黐落去嘅，可能黐得唔係好實，五點鐘黐嘅去到八點零就甩咗，我都係屋企人係婚禮完咗之後同我講番至知。啲裝飾唔係完全跌咗落地，而係卡住咗咁，所以啲賓客同影全體相嘅時候就會見到😣。但係我都仍然會介紹梁品製作俾其他新人朋友嘅，尤其係浪漫啲嘅新人會比較適合，因為佢哋嘅style都係浪漫同真切啲嘅。其實出面好多新人整deco可能都係一塊雲石面加兩個英文字同結婚日期，會比較平凡啲，我會建議有多啲budget嘅新人就可以考慮呢間公司喇。😉