會揀喺海洋公園擺酒係因為咁啱見到佢哋刊登嘅廣告，之後就去問啦。我一開始見到就已經擺咗佢哋喺first priority，我太太就唔係嘅，但我覺得喺嗰度擺酒會包埋賓客嘅入場卷都幾好，因為飲宴通常係夜晚，咁啲賓客日頭嚟到就好似好無聊咁，如果有個地方俾佢哋玩加埋夜晚嘅晚宴就perfect啦🤓。仲有第二樣嘢都好有特色，因為就算有啲人喺其他主題樂園擺酒，個餐廳係唔喺個樂園入面嘅，咁就同出面嘅酒店無分別啦。溝通嘅時候，海洋公園入面in charge嘅同事Lindsey會好細心同我講返個流程。我問嘢佢都好快覆，跟得好足，我都會講返我嘅要求係點，之後俾佢哋睇返有啲咩唔可以播出街，都會儘量配合返。就算有啲嘢未必即時答到我，佢都會同我講返啲原因點解做唔到，都好專業咁說服到我。成個big day嘅流程我哋都要事先去睇返幾時上菜、影相等等嘅嘢。原本佢哋淨係預備咗一部投影機，之後我話我想要兩個，佢哋都準備咗俾我。我問出面個mon有無得播相，佢哋都做埋呢樣嘢俾我嘅，不過end up因為我啲file問題播唔到部份嘅相，就淨係播咗一兩張相。喺簽名冊嗰度我就係用一幅畫去俾人簽名嘅，所以我要求嘅檯就會比較大啲，咁佢哋都會儘量安排俾我，成個流程都做到好smooth嘅👍🏻。佢哋都好貼心，當日仲有安排啲公仔出嚟半個鐘同啲賓客影相，啲小朋友一家人一齊玩都好開心。新人佢哋都有送年pass同餐飲禮卷，我都book返喺海龍王餐廳食晚餐，都係free俾我哋嘅，之後仲有預留咗二十張門票俾大家，因為啲兄弟姊妹忙咗成日都無時間玩，就送返門票俾佢哋半年內自己再去玩，咁我都可以慰勞返佢哋，overall我都好滿意啦🥰。我哋用咗海洋公園嘅海龍王餐廳做中式晚宴，個餐廳係喺水族館入面，成晚都可以睇住啲魚游嚟游去，都好特別。同埋我哋嘅pre-wedding係去沖繩嘅水族館影嘅，咁喺嗰度擺酒就可以迎合返個主題啦。同埋海龍王餐廳本身都係米芝蓮餐廳，完咗之後我問返啲賓客佢哋都話好食。不過上甜品嘅時候我哋就出咗去送客，返到嚟啲嘢都收晒，咁就搞到主家席嘅人都無咩食到。同埋新娘房入面係無洗手間，咁就要行返去出面去，都會有啲唔方便，咁呢啲方面就可以改善下啦🙈。因為佢哋裝修前都比較逼嘅，我就擺咗12圍，依家聽佢哋講裝修完都可以擺到15圍啦。當時嘅光線會暗啲，不過依家裝修完，我太太公司都去嗰度做咗annual dinner，佢都覺得光線充足咗，地方闊落咗，同埋投射都大咗，咁都改善咗嘅。我都有介紹俾朋友，不過因為佢哋擺嘅圍數比較多就唔適合啦。如果好似我咁想細搞嘅新人就會適合啲，因為出去啲酒店通常會間房，成個廳包晒係自己地方就會好啲啦😊。