我哋會揀鴻運繡莊首先係因為佢係老字號啦，我都去出名嗰幾間望過，但係價錢就會比較參差，咁鴻運繡莊就屬於質地靚入面中價位嘅。我係自己上去搵佢嘅，原本都無諗過佢哋會喺尖沙咀有分店，所以一開始係入元朗嗰間嘅，嗰度嘅員工服務態度好好，比較過其他間都係佢哋服務態度最好。唔知係咪我好彩，因為去佢哋度試衫係應該會預約好時間嘅，但我無約到，去到佢哋咁啱又有時間可以招呼我😝。同埋佢哋原本係淨係俾試一次嘅，但係員工見我眼神都係鍾意嘅，都預咗我會租，但係都不經不覺俾我試咗三四條。同埋佢哋嘅顏色會比較sharp，著上身就會比較挺身，佢嘅水晶掛都好吸引，加入咗啲水晶元素，可以揀多與少嘅水晶，個邊會裙晒水晶，都係得佢呢間先有。最後一共喺佢哋嗰度租咗三件，有褂皇、馬褂同媽媽衫，我租嗰條褂皇就算唔係水晶掛，但係下底嘅鬚鬚都係水晶嘅，攞上手嘅質地顏色性價比都會高啲😊。我原本都無諗住要租褂皇嘅，因為我budget方面都係想搵貴價入面嘅中價位，所以我試完都要考慮下，佢哋都無逼我落訂。我都有考慮到唔同裙腳嘅，因為新人第一次都唔知自己想要邊樣，元朗嗰度啱我嘅size嘅褂皇又得圓腳，咁我都想佢有嘅時候再上去試。之後我咁啱去開尖沙咀，佢哋尖沙咀又有分店嘅，我就直接上去睇啦，佢哋咁啱又要我個size平腳嘅褂皇，我試上身都好滿意，所以就即刻落咗訂啦。我入去元朗都錯有錯著嘅，因為尖沙咀間分店無晚裝，咁喺元朗嗰度睇到啲晚裝都幾靚，所以就帶埋媽媽同奶奶去嗰度租啦。嗰陣我已經喺尖沙咀嗰度租咗條褂，咁就問佢哋如果租埋媽媽衫有無優惠，佢哋都肯比優惠我，所以就喺佢哋嗰度租埋其他屋企人嘅禮服啦。不過還衫嗰陣就遇到少少問題🙈，因為我喺尖沙咀擺酒，咁有啲要去元朗還，咁我就問佢哋，佢哋都肯俾我喺尖沙咀拎衫同還衫，同埋仲俾我早一個星期拎，而唔係一日前先拎得，都好有彈性，又無額外費用👍🏻。同埋其實我一年前見過呢件褂，都會有啲擔心一年後係點，因為啲顏色著得多洗得多都會驚唔同，唔知過咗幾多手，咁佢哋都承諾條褂唔會租超過某個次數，不過最後去到睇都係同我之前睇一樣咁靚，cutting都係咁挺身，代表佢哋針線好夠，我都好開心。最後我有打去問佢哋有無得再final fit，不過原來佢哋係要婚期前一個月先可以咁做，我嗰陣又無認真睇張單，或者佢講嘅時候我哋都不以為意，咁佢哋就可以send message提醒下啲客人啦😉。同埋佢哋可能比較忙，我有一次主動上去睇，因為佢哋都仲可以轉款嘅，但都feel到員工有啲抗拒我哋星期六日上去，就希望我哋係閒日去先有時間俾我哋試下，好似想減輕工作量咁，呢個位就會改善下啦。我都會介紹鴻運繡莊俾其他新人，因為呢間會比較中上價位，如果有人問我條褂好靚喺邊度租咁，我都會介紹呢間俾佢哋。一場婚禮用嘅錢係好多，我租呢條褂嘅價錢都可能等於好多人成家人嘅晚裝甚至新娘咁多套衫，但係我覺得著褂嘅時間係比所有其他晚裝嘅時間長，同埋我老公覺得我著褂靚🥰，都係值得嘅。