最初留意到Hotel ICON係因為佢嘅裝潢夠modern，場地都四四方方、無柱嘅。加上我自己喺poly讀過書，都有少少情意結。我有比較過其他酒店，但係因為我想搵無柱嘅場地，選擇都唔多，我又唔鍾意水晶吊燈，所以最後都篩淨好少間可以揀。同埋我對食物嘅要求都好高，之前去過Hotel ICON食過自助餐都覺得佢哋啲嘢食好食。然後我亦有上網睇下人哋嘅comment，睇下人哋點講佢哋啲helper同salesperson嘅服務態度，綜合晒以上, 最後就揀咗喺佢哋嗰度擺酒喇😊。

我本身係想擺夜晚嘅，但係佢哋嗰度夜晚比較貴，唔係話佢特別貴，其實同其他酒店都差唔多價錢。開頭我都想勉強擺夜晚，但係後尾負責我嘅salesperson Emmy見我都有少少concern個收費，就建議我哋擺lunch，收費會平啲。所以最後我就擺咗中菜嘅lunch喇。喺溝通嘅成個過程入面，Emmy WhatsApp應機都應得好快，無論我幾夜搵佢佢都會應，我覺得呢一點都幾重要，因為新人，尤其係新娘子有好多嘢都會好緊張。我都有朋友係因為搵唔到個salesperson搞到好麻煩嘅，所以佢覆得咁快都好impressive，令到我哋好安心🥰。如果我有問題嘅時候，佢都會答到我，同埋會答得好具體。

Big day前一晚我都有double check我啲酒到咗未，因為我好早訂咗之後叫佢big day前一日送去嘅。跟住酒店嗰邊就話未到，最後花咗一輪功夫先發現原來我訂酒嘅嗰間公司漏咗單。喺呢個過程入面Emmy都好登我緊張，嗰晚仲特登等埋啲酒送到佢先走，雖然佢話佢本身都係喺office做緊嘢，所以無咩所謂，但係我覺得佢真係好好、好負責任👍🏻。當日都有啲啲嘢我覺得係可以改善嘅。親戚朋友同我講返嗰晚有個waiter黑面，嗌佢唔係幾應咁，又對啲小朋友唔係好耐煩，我當晚都有同Emmy講返。同埋當日嘅音樂有啲細聲，不過因為我唔得閒，就無即時同到Emmy講喇。由於我揀音樂都用咗一段時間，又係特登cut出嚟咁嘅，音樂太細聲就唔係好多人注意到我揀咗啲咩歌喇😖。最後就係個photo slideshow。我俾咗一堆相酒店幫我play，播放過程係無問題嘅，不過佢哋打錯咗我個名, 有啲尷尬😅。我都係呢幾日同返啲親戚朋友食飯，佢哋先講返俾我聽。我都有同Emmy反映返呢啲情況㗎喇，希望佢哋以後都可以有改善啦🤓。