一開始係我老婆上Facebook搵到ABc Flower Workshop嘅，因為佢鍾意啲靚嘢，我哋婚禮所有靚嘅嘢都係佢搵嘅🤣。我哋比較過三間，但係呢間又靚價錢又合理，算係性價比最高嘅。加上我老婆算係高要求嘅，車頭花嘅色都要襯埋架車，而佢哋又咁啱可以做到，所以最後就揀咗佢哋喇😊。

喺Facebook同佢哋聯絡嘅時候佢哋都唔會好hard sell，溝通過程都舒服嘅。最後佢哋就負責花車同成個教堂包括樓梯、走廊、檯凳同reception table嘅裝飾佈置。決定咗之後佢哋就開咗個whatsapp group。因為我老婆對顏色嘅襯托係好高要求嘅，所以都會成日問佢哋我哋架車係咁嘅色，可以襯咩色嘅花咁，想佢哋整幾款出嚟睇下。佢哋又真係會整到出嚟影相俾我哋睇喎，又會建議埋咩顏色嘅花會好啲。教堂嗰度嘅顏色佢都會幫我哋諗埋要襯咩色好啲，都好俾心機👍🏻。我哋問親嘢佢哋都會覆得好快。

Big day前我哋都有一齊去場地嗰度視察同埋開會，佢哋就派咗兩個員工嚟，態度好好，會同我哋解釋啲牆會點樣set up，又會好詳盡咁問張reception table有幾大、講台有幾大、邊度做得啲咩邊度唔做得啲咩咁，真係好專業好幫得手。👍🏻 去到Big day嗰日，我哋婚禮係兩點鐘開始嘅，佢哋十二點九都已經嚟到佈置，有三個同事嚟幫手。最後出嚟嘅效果真係好靚，賓客有讚，而我哋都好滿意🥰。我哋就最鍾意條樓梯，佢哋喺扶手度綁咗啲花之外，仲喺地下擺咗啲假嘅蠟燭，襯托出嚟嘅效果真係好靚。😍 因為個教堂本身都好靚，如果個裝飾佈置唔夠靚就會嘥晒成個堂㗎啦，所以裝飾真係好緊要啊🤓。我哋都算比較奄尖嘅，特別係我老婆真係好高要求，一唔靚就好唔鍾意。但佢哋態度真係好好，成個過程佢哋都充滿笑容，好親切， 佈置得又好靚。😁 喺婚禮期間雖然佢哋唔係攝影師，但都會幫手影下video，幫我哋留個紀念咁。最後佢哋仲好負責任咁提議埋我哋喺邊個時間佢哋會開始收嘢，等我哋唔駛遲還場，如果唔係我哋就要俾多啲租場嘅費用啦。😌 只要budget啱，我一定會介紹佢哋俾其他朋友。雖然佢哋嘅收費算係中等，但係一開始講咗嗰個價就係嗰個價，唔會再有隱藏式收費。👍🏻 不過佢哋個office喺啲舊工廈入面，架𨋢就會比較舊，係有個人喺入面開閂𨋢門嗰隻，男仔去就無乜所謂，但係對女仔嚟講可能就會差啲啦🙈。