一開始留意到Holiday Inn係聽朋友講同上網search到嘅，覺得佢哋個幾靚，無柱嘅，因為我擺嘅圍數唔多，佢哋嘅minimum charge就啱晒我嘅要求，所以最後就揀咗喺佢哋嗰度擺夜晚嘅中式wedding啦😆。我一開始係send email同佢哋聯絡嘅，之後就約睇個場再聽佢報價，員工解釋得好清晰，用埋ipad俾我哋睇成個flow，又同我哋講埋要準備啲咩，唔會好hard sell咁。

最貼心嘅係成個過程好多嘢佢哋會幫我搞掂，相同歌嗰啲原本佢哋有要求某個格式嘅，但我整唔到，佢哋都幫我整埋，又幫我編埋位，做咗半個wedding planner咁。圍數嗰度佢哋無要求我一定要擺幾多圍，可以好彈性咁幫我安排。

Big day嗰日有個assistant會全程跟住我嘅，佢都好貼心，會喺我後面配合我，知道我想點，咁我就完全唔洗擔心啦。場地方面，原本我淨係book B同C廳，但因為A廳無人book，佢哋就俾晒成個場我，所以個場都好大，完全唔會迫狹。佢哋又有幫我佈置，candy corner嗰啲擺返中間。最後賓客都有讚個場好grand好靚，雖然Holiday Inn嘅門口有啲舊，但係估唔到佢哋嘅ball room會咁靚😍。

嘢食賓客都話好好食，尤其係隻乳豬，佢哋去其他地方飲過比較過，都話Holiday Inn嘅嘢係最好食嘅。當晚我喺嗰度住多晚嘅，佢哋都會考慮到可能我哋無乜時間食嘢，pack咗每款一盒嘅嘢食上房俾我哋食。成個wedding我真係好滿意🥰親戚朋友都好鍾意，我有啲同事飲到醉咗喺張檯嘔，啲員工都一樣好好service。

我都已經介紹咗Holiday Inn俾好多人啦，佢哋真係物超所值啊，想擺比較少圍數嘅新人就會比較適合佢哋啦，但係可能因為我嗰陣係開全場先會咁大，正常情況都係會間半場咁嘅，都要留意返呢一點啦。