我之前都有聽過海洋公園有搞婚禮嘅，同埋因為我同先生係喺酒店工作認識，所以都想搵返啲酒店酒樓以外嘅特別啲嘅婚宴場地，我先生又喺海洋公園做過part-time，所以有個情意結😙。去咗海洋公園個場地睇咗之後覺得價錢相宜，我同先生都鍾意大自然，呢度有啲海洋生物咁都好特別。

其實我哋主要係邀請屋企人，海洋公園提供嘅圍數啱啱好，雙方家長都無意見，所以最後就好順利揀咗喺海龍王餐廳搞晚宴啦😆。因為我哋都做開酒店嘅，所以大概知道啲價錢同場地嘅嘢，就唔洗點樣再比較其他間啦。佢哋嘅員工講解得都好清楚，又好flexible提供婚期半年前可以改期嘅服務，因為我哋當初決定係教堂行禮先，但係教堂個期係未firm實，佢哋有呢個terms對我哋嚟講就好方便啦😇。

個場喺期間都裝修過，big day見到個場比我哋一開始去睇場更加靚，好多親友都有讚，甚至其他婚禮vendor都話個場地好靚，嘢食方面大家都讚好食，真係都喜出望外😍。同埋海洋公園又送埋飛，就算我哋去完教堂得返一兩個鐘俾啲賓客去玩佢哋都好開心，可以周圍去走下都比較老少咸宜啲🥰。

Big day當日嘅rundown一定會臨時有變，佢哋都會即時反映到點樣幫我安排啦，因為佢哋安排咗吉祥物，所以時間會比較緊迫，佢哋會同吉祥物嗰邊溝通幾時出場會好啲，安排得好好👍🏻。而且佢哋好貼心，敬酒嗰度會幫我哋安排咗杯好似酒顏色嘅汽水，等大家敬酒會輕鬆啲。每一個動作都會有個工作人員喺隔離幫手，敬酒都有個工作人員帶住我哋行，唔會盲中中亂咁去，都照顧得我哋好好。

雖然佢哋有follow up啲細節，但係我哋臨尾都係比較緊張，有好多嘢要處理，如果佢哋可以再早少少嚟同我哋confirm就會更加好啦。我一路都有介紹海洋公園俾其他新人，因為出面啲酒席價錢真係越嚟越貴，佢哋嘅價錢相宜之餘仲包埋入場卷，真係好抵🥳。