我開頭上網見到幾個blog，係介紹啲收費唔貴但係備受好評嘅獨立化妝師，有啲係偏貴嘅，會成隊人嚟化埋啲姐妹妝，但係因為淨係得我、奶奶同繼母三個人要化妝，就唔需要全隊嚟化。

之後我都有搵返啲化妝師嘅Facebook睇返佢哋嘅妝我鍾唔鍾意，有啲可能個妝ok但個頭我唔鍾意，主要係我自己對頭髮造型有啲在意嘅位。搵到我比較滿意嘅化妝師之後我就問價錢，都了解咗成個過程係點，譬如上去試妝係點收費，同big day當日嘅價錢可以點樣有折扣，有啲化妝師可能係試完妝當日commit又可以扣少少錢咁。之後就睇佢知唔知道我想要嘅嘢，原本我想book十二點到五點，但係之後唔想咁麻煩，就索性想book到八點可以補埋妝。其實已經算係佔據咗個化妝師嘅一整日時間，我都明白對人哋嚟講會有啲唔方便，所以就問咗啲化妝師。可能因為我嗰陣擺酒係農曆七月，少啲人擺酒，所以我問嘅化妝師都可以接受我咁嘅時間安排。

Once and Forever嘅價錢好合理，我睇到佢哋set嘅頭係望落去有set過，但係唔會誇張到晚宴feel咁，我都鍾意自然啲嘅，所以最後就揀咗佢哋啦😆。之後上去佢哋度試妝，佢哋會首先問咗我嘅要求先，再睇埋我著嘅晚裝，因為我係無著婚紗嘅，淨係得一套掛同一條淺紫色有少少似婚紗嘅晚裝。我同佢哋講咗大概之後，佢哋就俾返之前其他客嘅相我睇下如果咁鍾唔鍾意。因為當晚有泰國人嘉賓，佢哋會比較濃妝，我唔咁濃好似唔得體，但係我又自己唔鍾意，所以就問佢哋點樣可以權宜地做到樣樣嘢都ok呢，佢哋真係好俾心機幫我諗咗幾個方案，好尊重我嘅意見😇。

最尾試咗個妝老實講係好淡嘅，我平時自己都係畫眼線同畫眉，都發現佢哋嘅眼線係比我自己畫嘅仲少，但係覺得去到當日應該會再視乎情況隆重啲，所以就覺得ok啦。我唔係長住香港，嗰陣要特登訂機票返去試妝試褂嗰啲，時間就好倉促，所以都無貨比三家逐間逐間去試，過到自己嗰關就ok啦。我哋搞咗兩場婚禮，但係接新娘環節係泰國先有，所以喺香港就係五點鐘斟茶，之後就開始晚宴。我哋想有幾個鐘可以影相，就叫咗攝影師三點到，所以希望Once and Forever佢哋大約十二點到，幫我哋做晒成個造型。雖然佢哋唔係全日嘅服務，但係都stay到八點幾，幫我最後一轉補埋妝先走，安排得好彈性👍🏻。

當日有一個女化妝師Vivienne同一個男化妝師Kitson，Vivienne就係幫我試妝嗰位，好有禮貌，當日嘅態度好謹慎，幫我黐眼睫毛係完全唔痛唔難受，好熟手，兩位都好夾。因為我先生有病在身，之前中過風，所以當日係好辛苦，成日都係要挨嘅。我好擔心佢，就有同化妝師講我好大壓力，大壓力到要喊咁。佢哋嗰陣聽到都驚，話呢個新娘咁大壓力，之後big day先知原來我係咁隨和，因為我最在意唔係啲細節，而係我先生身體o唔ok😣。最後好彩都順利進行到，因為兩位化妝師打點好一切，好周到，問咗我哋想要點之後就可以即刻做到，唔需要搞咁多嘢，全程嘅mood都好好。

嗰日會出去外影嘅時候好熱，我先生都比較怕熱，化妝師見到咁都會盡可能去幫手，幫我哋抹汗拎嘢仲去買埋水，雖然呢啲嘢化妝師可能都會做，但係佢哋真係做得比平常人多好多，好唔話得🥺。去到最後，我唔記得同我啲女仔朋友講要點樣著我條晚裝裙，係自己著唔到嘅，啲朋友諗住幫我都唔識幫。但係Vivienne佢哋對晚裝呢啲好多經驗，一個人就幫我搞掂，呢啲嘢真係好印象深刻。佢都好似變咗我嘅一個姐妹咁，同我嘅朋友有傾有講，好似大家一齊出去玩咁，好慶幸當日有佢哋喺度啊🥰。

我哋好滿意所有嘢，因為開頭講咗我想要啲咩唔想要啲咩，譬如話我唔習慣見唔到自己眼肚，就問佢哋可唔可以幫我打扁啲個臥蠶位，佢哋已經即刻做到，真係100分，已經無嘢可以挑剔到佢哋，咁樣嘅情況底下無咗佢哋係差好遠。連酒樓嗰邊嘅人都唔見咗幾次，都係要佢哋幫我去嗌好多次，已經做咗好多extra嘅嘢，所以最後我哋好開心封咗double嘅利是佢哋。最後嘅妝同試妝嗰陣有啲唔同嘅，因為佢哋都跟我意見再改咗，其他朋友話我嘅妝係似返我，唔會變咗另一個人咁，同埋好重要嘅一點係Vivienne留意到我有大細眼，已經即刻幫我改善到，化出嚟嘅妝會令我睇落靚啲😙，但係我喺泰國婚禮嘅化妝師就算知我有大細眼都改善唔到，最後影相全部都會睇得出。大家都讚化妝師好好，問我用咗幾錢，我話俾佢哋聽之後佢哋都話好平，有無搞錯，成件事嚟講真係超值啊🥳。