籌備婚禮嘅時候我上網睇好多資訊，like咗好多Facebook page，之後會有啲相關嘅page彈出嚟，就咁睇睇下見到Mayona啦。睇到佢哋啲相已經覺得啲衫好靚😍，就book咗佢哋上去試啦。

原本我個list已經有幾間舖頭，試咗頭幾間都覺得有啲猶豫，但係一試到Mayona就覺得係佢哋啦，之後淨低嘅幾間都無再去試，就喺佢哋度租咗我嘅兩條婚紗三套禮服，先生租咗一套禮服，媽媽同奶奶都一人租咗一套媽媽衫😊。

佢哋嘅環境好大，款式好多，啲衫都擺得好整齊。新娘嘅婚紗同晚裝會擺個一個區域俾我哋揀，我入去望嘅時候佢哋嘅員工就會一路問我鍾意咩款，之後再介紹啲裙俾我。佢哋會幫我分析下我嘅身型睇下適合咩類型嘅裙，因為一開始我覺得自己唔係好適合魚尾，所以揀嘅裙都唔係魚尾，但係佢哋都會鼓勵我試下唔同嘅風格，最後試咗就發覺原來我都著到魚尾😆。

負責我嘅同事會記得晒我揀過嘅裙，一返咗啲款佢覺得我會鍾意嘅話都會同我傾。揀完裙之後我仲上過去幾次，因為自己三心兩意想再睇下其他款，每次book嘅時候佢哋都可以俾我book到，我去之前同whatsapp佢哋講定我想試邊幾條裙，去到佢哋已經準備好晒俾我，就唔洗驚條裙會俾人攞咗試唔到啦🥰。佢哋可以俾我無限次轉裙，條裙有期嘅話都會俾我轉，唔會淨係限死一條咁，policy好彈性。

去到Big Day當日我著嘅裙，甚至係我奶奶同媽咪著嘅衫，大家都讚好靚，唔係typical其他地方會望到嘅款🥳。我結婚嗰期有好多社會運動，其實都驚會唔會影響到攞衫還衫，就一早同咗Mayona溝通，佢哋都驚會有突發情況，所以俾我早兩日去拎衫同遲兩日還衫，呢樣嘢我好記得，佢哋會因應出面嘅情況提供啲其他plan俾我👍🏻。

不過好似唔係好多人認識佢哋，我入啲新娘group都好少人提到佢哋呢間舖，唔知係咪因為啲衫係佢哋自己design而唔係外國牌子，但係我覺得佢哋啲衫真係好靚，價錢又合理，如果佢哋可以再宣傳多啲、同多啲人認識佢哋就更加好啦🤓。當日已經有賓客問我啲衫係佢邊度租，我覺得無執著一定要外國牌子嘅新人就好適合佢哋啦，同埋佢哋仲有埋婚紗攝影嘅package，咁想喺一間舖頭搞掂晒啲嘢嘅新人就可以考慮下佢哋😇。