係朋友介紹Perfection俾我嘅，無比較過其他公司就直接上去佢哋度試衫啦。佢哋試衫嘅環境寬敞，有私人空間，女士嘅款式好多，男士就會偏少啲，所以轉咗套女士嘅俾我揀啦。佢哋解釋package好清晰，價錢合理。

Serve我嘅職員Monica會俾我自己揀先，揀完之後再話我聽我身型啱咩衫，之後攞咗好多類似風格嘅新款俾我試，效果係好過我自己揀嗰啲😆Monica serve咗我兩次，我第二次fitting之後佢就同我講佢要放產假，但係放完產假佢都一路keep住whatsapp我，問我揀唔揀到衫啊、有無緊張啊嗰啲，我婚期嗰陣社會運動有啲問題，佢都會問我點啊咁，好上心。

我一共租咗9件衫，包括我嘅婚紗晚裝、先生嘅禮服、媽媽衫同奶奶衫。不過攞媽媽衫final 嗰陣有啲小插曲，佢哋職員攞錯咗件衫，明明睇張相係唔啱，佢都堅持話係啱，最後要搵第二個職員幫我哋換返先解決到。

佢哋嘅sales職員好好，但係final fit嘅裁縫姨姨真係唔得，譬如我嗰陣schedule咗三點試衫，同埋老公、媽媽、奶奶一齊上去，我哋已經係早咗上去，咁時間應該係鬆動咗，但係佢就不停催我哋快啲，話佢好多嘢做，對我哋試衫好唔高興咁😟間房咁細我哋係要5個人迫喺度，之後我著完衫自己都未睇，佢望一望就話ok啦咁，又或者我哋試衫嘅時候想襯埋對鞋睇吓效果，佢又話唔洗著鞋，淨係試衫就得。我諗嗰度嘅其他職員知道我哋有唔高興，我哋走嘅時候佢哋有同我哋講返唔好意思，但係無exactly話因為咩事。原本final fit係schedule咗一個鐘嘅，個time slot淨係得我哋一組客，但係最後最盡用咗五個字時間，我哋四個人有九套衫，所以真係好趕😣個裁縫姐姐嘅態度應該要改善下，因為真係好影響，final fit前所有嘢都好緊張，佢嘅態度就會令人好唔舒服。

但係賓客都有讚我嘅裙同媽媽衫好靚，佢哋嘅sales職員好好，還衫嗰陣因為社會運動，所以無車，啲staff返唔到office，佢哋就叫我擺喺門口，cctv睇到我擺咗就ok，好彩最後都有同事可以趕到返去攞。