我喺去朋友婚禮做姐妹嘅時候識到Once and Forever嘅，見到佢哋幫我嘅新娘朋友化妝化得好好，所以自己定咗婚期之後即刻搵佢試妝，試完妝好滿意就即刻落訂confirm咗big day全日嘅化妝啦😆。

試妝嘅時候佢哋會先建議我哋著白色衫，盡量染咗頭髮先，但係我因為返工問題染唔到，佢哋就會跟我嘅髮色去design啲髮型。不過佢哋都話因為我嘅頭髮唔係最後final嘅顏色，所以佢哋會盡量俾唔同style我試。原本試妝plan係包咗一定數量嘅妝同頭嘅，但係最後係over晒，整咗差唔多四五個頭，咁啱無客喺後面可以整耐啲。我啲頭髮好多，但係佢真係好有心機幫我整，我叫佢坐低抖下佢都無坐下，就咁樣企喺度幫我整咗幾粒鐘🥺。

化妝師好好態度，不斷問我嘅意見，有時我未有反應佢已經對個妝有意見，唔會話覺得整咗唔好嘥咁，覺得唔啱我就已經會直接講，要求好高。同埋佢一下就已經睇得出我嘅眼同面大細適合咩妝容，有陣時我唔明唔啱我嘅妝係點，就問佢哋可唔可以整下俾我睇，佢哋一樣會照整，好專業👍🏻。

印象最深刻嘅係big day當日佢永遠係第一個遞紙巾俾我嘅人，好照顧我，同埋我嘅皮膚好乾，但係佢可以完全take care到呢方面，個妝係全日都無甩。佢仲要做埋攝影師嘅工作，因為佢一直貼身跟住我，有陣時攝影師影緊其他人，化妝師就會即刻幫我影晒相，當係有啲花絮可以俾我睇住先😊。中間有啲時間佢仲加咗個頭俾我，見到有時間就會幫我轉。佢哋帶咗棵鮮花俾我做頭飾，嗰日好熱，佢會盡量keep住啲花唔好咁快霉，就算呢啲係我唔會睇到嘅嘢，佢都一樣咁細心🥰。

Big day嗰日我叫佢四點鐘到，佢三點九已經到咗，仲早過我起身，佢真係好快手，幫埋我嘅伴娘化，就算得佢一個人化都好快搞掂，所以嗰日所有嘢好準時，無overrun到。賓客大讚我個妝同頭啊，佢哋嘅風格會清新啲同young啲，鍾意呢啲風格嘅新人就好適合啦🥳。