我哋係喺會展嗰度行下睇到My Dream Wedding嘅，佢有一張相係有個遊樂場嘅，咁我就係俾呢張相吸引到，我老公好鍾意嗰幅相嘅background😍。其實我哋嗰日完全冇諗住影婚紗相，嗰次去會展純粹係去做research咁嘅心態。我本身都諗住係外國影，但係未諗好去邊度影，而佢擺左嗰個場景嘅水晶畫係個counter度，我哋係俾佢個景吸引咗，先入去了解。我哋喺婚展聽完就即刻俾左錢，最主要係因為我哋真係好鍾意佢個package，佢嘅佈景係我哋想影嗰種風格😆。

我哋係飛去韓國影，然後係香港再有送多輯相，兩輯都係studio影。My Dream Wedding包咗當地酒店，有個翻譯妹妹，同埋有位姐姐係一路take care我哋。全程拍攝令我哋好意外同好滿意，將我哋照顧得非常之好。而攝影師係一位韓國人，過程中亦都有比我哋專業意見，嘗試令我哋拍攝過程冇咁緊張，我哋有話俾佢聽自己鍾意咩風格，佢亦都會配合我哋😇。佢哋影完會比我哋睇下同問我哋「呢個style得唔得」，或者事前會問我鍾意邊類型嘅風格、髮型同影邊個角度靚啲，話咗比佢聽佢都會就我。我話「呢個角度影會靚d啊」，咁佢影完又會比我睇，問我o唔ok咁樣。

最印象深刻係個化妝師，雖然佢冇乜笑容，但係佢真係好上心。一開頭set左個頭，咁個髮型就只係紮起d頭髮，番到黎嘅時候佢哋個團隊都好堅持話如果我全部衫都淨係用同一個髮型會覺得蹝左。我一開始覺得紮起個頭髮其實唔岩我，因為我塊面肥，而個團隊係不停叫我嘗試，唔希望我浪費左。佢哋真係會好堅持，佢哋用左好多心機去說服，所以就想頭髮放落黎遮住塊面咁樣🙊後尾再換衫影咗出黎就會知道佢哋講得啱。我一開始一路唔肯梳起個頭，淨係信自己，但係個攝影師都會幫我就個角度各樣，其實真係好感動🥺。化完個妝佢哋見到我好似唔係咁鍾意，佢哋又會問我覺得邊個位唔鍾意邊個位唔好，之後逐步執到全部我都滿意為止。

有啲公司可能佢哋會見到你揀咗你鍾意嘅，咁就唔會再比多啲專業嘅意見，但係My Dream Wedding就會，譬如話會問覺得呢個眼影啱唔啱啊，呢個唇膏啱唔啱啊。佢連畫條眉都會解釋比我聽，話我個面形唔適宜畫太平嘅眉嘅咁。我哋會問個攝影師我哋可唔可以揸呢啲花啊，會唔會有其他顏色、可唔可以影呢啲pose啊，佢哋就會比到好專業嘅意見要點樣揸啲花。我哋有同佢哋講我哋想個style casual d嘅，唔使咁傳統，佢哋係好配合，成件事好舒服，連個翻譯都非常用心，感受到佢哋想我哋開心🥰。

我覺得個化妝師可以有番d笑容啦，不過佢好professional嘅。個攝影師我就覺得可以唔使咁傳統，即係一個場景可以用唔同風格影多一兩張比個客選擇，我覺得佢可以主動嘗試多啲，可以建議我哋大膽啲，唔好用咁傳統嘅拍攝手法啦😝。我會介紹My Dream Wedding比我身邊嘅新人啊，我覺得冇乜方向嘅新人會比較適合呢間公司。佢哋嘅價錢比較優惠，個package有兩輯相，成個價錢都合理，影得好靚。

韓國嗰度係好好嘅，雖然佢哋個studio好簡單，一棟地下連埋上天台咁，啲衫嘅style都唔錯，不過可以入多啲新款，但係影出嚟超乎我哋想像，佢哋嘅場景好，所以好簡單嘅background影出嚟都好襯我哋，感覺真係非常之好，所有親戚朋友都問我哋係去邊度影😙。香港果輯嘅化妝、髮型同場地我哋都覺得一般啦，個攝影師比較傳統，可能係因為場地、攝影師手法同經驗，相比之下我都係鍾意韓國果輯多啲喇。