其實我哋係有目標咁去揀酒店嘅，想揀返港島區，因為屋企人同大部分親戚都係住喺港島區，另外就係因為我哋擺嘅圍數唔多，如果大嘅場我哋擺咁少圍數就好似好空曠咁，所以一開始就已經鎖定咗港島嘅幾間酒店啦。之後去婚展見到城市花園酒店，佢哋員工解釋得好清晰，因為啲leaflet都標明晒邊個價錢就會包啲咩，唔會有隱藏式收費，有額外要收費嘅地方佢都會話聲我知。

我落訂之前有親身去佢哋度望過下，四大長老覺得ok我就ok啦😆。我開頭諗住擺十零圍，就覺得喺個場地大小啱啱好，又近啲屋企人出入，所以最尾就揀咗佢啦。

我一有問題喺whatsapp問佢哋佢哋都好快覆，譬如reception嘅位要點樣擺，佢哋好helpful👍🏻。因為我有請mc，酒店嘅人就會同mc聯絡，mc先再同我聯絡，所以我喺婚禮嘅過程入面係比較少直接接觸到酒店嘅人。因為我忙緊其他嘢，mc就會幫我處理晒大部分嘅雜項，同酒店嗰邊討論完再同我講。

親戚朋友都有讚啲嘢食好食啊。有機會我會介紹城市花園酒店俾其他新人朋友。佢哋性價比高，因為我幫襯嘅時候佢哋仲做緊promotion，有擺夠一定圍數就會送幾多圍俾我咁，所以我覺得如果係啲小嘅婚禮就好適合🥳。好似好多酒店酒樓都會有呢個問題，就係佢本身嘅deco係好basic，我就要再出去搵deco公司，如果佢哋可以改善下deco就更加好啦，新人都可以慳返一筆錢。