婚展嘅時候，感覺佢哋有誠意，服務態度又好，所以無比較到其他公司，join咗pre-wedding同big day V+P同租衫嘅一條龍服務☺️。

Pre-wedding係喺香港影嘅，outdoor同studio都有，拍攝之前有同攝影師傾過想點影，佢哋都有俾啲意見。攝影師好好，好多嘢都跟足，plan晒全日可以去邊度影，影相嘅時候又好識搞氣氛，我哋對佢讚不絕口啊😍。佢哋嘅溝通技巧好好，因為我哋唔慣影相，所以動作好生硬，佢哋就會用啲好搞笑嘅方式去令我哋無咁緊張😆。不過相簿個排版就唔係咁鍾意，如果編輯過程中佢哋問下客人想要啲咩風格，會令客人覺得更有誠意。我係有要求嘅人，加上因為我本身做設計，所以更加執著，最後所有嘅排版同調色都係我自己設計。佢哋前期係ok，但係後期編輯呢part就要再改善下啦🤔。

我哋有開個whatsapp group方便溝通，但係跟我哋嗰個女仔會問完再問，例如試西裝咁，佢問返我轉頭揀咗邊件衫。啲衫喺婚展同揀嘅時候有啲出入，我哋上到去先發覺啲衫唔係我哋想要嘅衫，我覺得就算唔係完全一樣都應該係要類近，參差唔好咁大🙈。不過最後親朋戚友有讚我哋啲衫好靚。

佢哋顧客服務嘅態度係好好，俾人嘅感覺好輕鬆。攝影師都真係好好嘅🥰，Big day嘅攝影師同pre-wedding係同一個，嗰日佢都好好咁幫我哋嘅朋友影相，我好滿意啊😇。我哋由朝早九點幾影到五點幾，攝影師全程喺度跟出跟入，啲rundown攝影師都有俾意見。攝影師好細心，佢影相嘅時候會同我哋互動，令到我哋都好開心輕鬆😇。甚至係我嘅親朋戚友都覺得好開心，呢個攝影師係氣氛之王嚟嘅，我覺得very good啊👍。

其實佢哋好清晰咁解釋個package，但係有啲位就要再注意下，例如我作為客戶唔知佢哋會攞啲相簿去台灣print，最後我要俾shipping費用，如果當中有交代會更好。可能係喺婚展講解得太快，我諗解釋嗰part要再詳盡啲，例如相片會唔會俾返全檔我哋等問題，溝通上面可以改善下就好啦🙈。