之前有朋友喺Red Wedding影過prewedding，覺得唔錯介紹比我，而我就想指定返幫我朋友影過相嗰一Team人，Kaka都滿足到我嘅要求，幫我安排，仲建議我可以帶一套自己嘅衫去影，造型會特別啲，而價錢有優惠😝，加上朋友影過都比到信心我，於是就揀咗Red Wedding。

我哋預約上去試衫都幾方便。因為我平時返工比較難就到時間，但只要同Kaka講聲，佢就會幫我預約😚。試衫嘅環境都幾闊落，有一個大台同全身鏡，呢種試衫設備唔係間間舖頭都有，試衫時間又冇特別限制。我哋開始係睇相揀款，但款式真係好多🤗，Kaka就幫我介紹簡單大方嘅款式。仲會再因應我同老公嘅身形推薦一啲新款，而且禮服都幾新淨。而試好晒所有衫，佢哋都會幫我哋度多次個身型，影相嗰日所有衫都係好啱身。

化妝師Jessica同攝影師阿B都係朋友之前推薦比我。我幾鍾意Jessica化嘅妝，偏向自然風、簡單清淡，而且佢全日係我隔離，時刻幫我補妝😝。Jessica比較talkative，佢會一直同我哋傾計，間唔中講吓笑話，引我哋笑，令我哋放鬆啲。而阿B攝影師影相技術真係好勁，做嘢好快手，有陣時我表情比較生硬，佢都可以幫我捕捉到最自然嘅一面，好輕鬆咁玩吓就已經影完一輯相😆。睇到相之後，發覺好多相都係我哋不為意嘅時候影，所以出嚟嘅效果好自然，唔會好大眾化。即使阿B喺同一個地點幫我啲影，但佢都可以影出完全兩種唔同風格，感受到佢技術高超同埋好專業👏🏻。

另外，我覺得Red Wedding嘅室內佈景好大好靚，一開始影室內景都夠我哋玩好耐，又有好多道具。就算影外景，佢哋都準備好多小道具帶出去比我哋，例如係我最鍾意嘅沙灘景🏖️，佢哋會準備埋野餐墊，仲會點晒蠟燭，營造氛圍，我哋只需要自備一啲氣球🎈就得，啲氣球都係助手幫我哋充埋氣🤣，所有嘢都準備得好充足。所以，當日整個拍攝過程係非常順利👏🏻，基本上係影完一個景之後，下一個景嘅佈置就已經準備好，一切都安排得好smooth，仲有空餘時間比我哋食lunch，所以我真係好滿意。