其實我都有參考過，網上啲評語都睇到Palette佢哋做planner既服務都好好，而同佢開始聯絡嘅時候佢就已經好friendly好積極咁回答我嘅問題。 出嚟見面嘅時候Zoe都會首先有問清楚有啲乜嘢我已經做咗，一路都會guide住我提醒我有乜嘢我需要嘅。👍🏻特別係當我知道佢哋有一個rate plan嘅時候，佢都會好靈活咁tick走一啲我已經做咗嘅項目，跟住可以俾我加番啲我未諗過或者係我未準備嘅item入去，都唔會話「哦你用唔到啊冇辦法㗎喇！」完全唔會！😁😁呢一點真係好impress到我，佢哋服務客人可以做到咁「人性化」係非常難得。

Zoe係一個好有準備嘅Wedding planner，佢唔會出嚟得個講字，佢係有晒電腦有晒presentation可以好完整咁話俾我聽一個婚禮流程應該要點做同埋要留意啲乜嘢。😃其實我都冇諗過一個wedding planner 可以認識晒全香港所有嘅商戶，而當我話俾佢聽我揀嗰個場地嘅時候佢真係可以好熟悉，令我convince佢真係識個喎！ 🙀講到試衫真係唔讚唔得，其實我冇諗過Zoe會真係全程陪住我，其實我根本都冇要求佢陪我試衫，反而係佢自己提出話試big day衫嘅時候一定要帶埋佢去，你都知啦，其實呢啲都係攞咗佢時間，佢仲要花時間去陪我試衫做埋呢一步真係為我付出好多。🥰🥰

其實搵planner陪住自己真係有好多好處，例如我幫襯嗰間一條龍公司， Zoe會留意到啲細節，而老實講呢啲細節我自己係唔好意思出聲嘅，但係經過Zoe問一問，啲細節好快就處理咗我自己又唔使出面，呢一點其實planner嘅價值真係好大。 其實唔止係試衫，就算跟住要同酒店開會同Banquet sales嘅同事講 rundown， Zoe都會陪住我幫我留意啲細節，然後將我婚禮成個流程逐樣逐樣合埋一齊，感覺真係令我好放心。💛 其實結婚前真係可以有好多好煩嘅事，例如我老爺奶奶掌握圍數嗰方面，今日可以話加一圍，聽日就可以話要多兩圍，跟住第三日又可以話要多三圍！不過好彩有Zoe幫我中間去調合，先可以唔需要我自己去煩。😉

不得不提嘅就係講到教堂嘅場地佈置。記得當時我都有諗住買佈置去佈置婚禮嘅場地，但係Zoe都話唔好嘥呢啲錢不如租就好喇，咁好啦我就決定去租啦，點知佢係會好到幫我去攞埋佈置，攞埋佈置物資都未夠，仲要當日big day幫我去佈置埋個場地！做到咁我真係諗都冇諗過！ 我都有喺Pallette 嗰度搵埋司儀，亦都係好彩呢一位MC我先至可以掌握好啲時間。因為有啲原因當日酒店場地係over run咗嘅，但係MC都會顧及場面幫我捉緊番啲時間追番個流程。

仲有仲有，當日big day其實我同老爺奶奶都發生咗一啲小插曲，都係好彩Zoe喺度夠醒目識得幫我處理當時嘅情況。講到尾有一個planner真係可以幫到手，有啲乜嘢突發情況點都有一個專業嘅人喺側邊睇住呢一點一定要讚！💯💯💯💯💯💯