我覺得DW早拍晚播嘅作品真係好吸引，尤其係影男方嘅部分，影得好有型，拍嘅手法好好，之後又有其他朋友結婚都係搵佢哋，睇過DW喺婚禮嘅表演都覺得幾唔錯🌟。我自己算係做選擇好快嘅人， 加上我又唔係有好多要求，加上見到DW都幾多likes，所以就毫不猶豫咁選擇咗DW。

DW 回覆我哋都好快，而且佢哋都好有經驗，俾咗個schedule我哋參考，又會問定我哋吉時同出門時間，再set up個flow✨。過程中都覺得同佢哋相處得好好，態度又好，令我哋完全唔需要擔心。 Big Day之前，DW都會問吓我哋有冇啲特別嘅要求🥳。 我最深刻印象嘅係，因為package係包一個助手，我一開始以為個助手係幫佢哋手，可能係關於器材嗰一方面，反而助手主要係幫我哋手😚，例如喺朝頭早敬茶嘅時候，佢會同我哋講個步驟係點樣， 又會教爸爸媽媽要講啲咩嘢，又會額外幫我哋影吓相，呢一樣嘢我都覺得幾驚喜，冇諗過會有一個助手嚟guide住我哋新人，兄弟姊妹同父母🥰，令到我哋都清楚知道要做啲咩。 

我覺得DW真係好專業💖， 我記得嗰陣時我哋影外景嘅時候，DW係會分返男女兄弟姊妹兩邊同步影，呢個位我幾欣賞。 因為我之前做過姊妹，多數啲攝影師影緊新郎同兄弟嗰邊嘅時候，多數新娘同姊妹就會喺隔離傾偈，我覺得咁樣就會嘥咗啲時間。 因為我揀咗2P 2V，所以佢哋可以分開進行唔同嘅工作💯。出到嚟嘅成品我哋都好滿意，甚至有啲相DW都有幫我哋再調校下啲色tone😙。 至於早拍晚播嘅片，我就覺得遲咗少少播，因為都差唔多10點幾先播。可能係因為影相期間有親戚插入嚟合照，令到影相嗰到用多咗時間，定可能條片真係剪耐咗，因為我哋係入咗席先證婚， 變相佢哋要之後先可以放返啲證婚嘅片段入去條片到，咁先會完整啲，但如果可以早少少播，就可以令到賓客佢哋可以預返時間走🥹。