最初係喺 IG 見到 Vows & Bows，之後又有朋友介紹，就決定約見佢哋。最打動我哋嘅係證婚人嘅主持 Style，佢把聲好甜美、說話温柔，用字恰當又情感真摯，一聽就知好適合我哋。

第一次聯絡團隊嘅時候，已經感受到佢哋處事認真嘅態度。整個流程講解得好詳細，每當我哋有唔明白嘅地方，佢哋都會耐心解答，逐步 guide 我哋去完成呢個婚禮。婚禮前夕仲特登幫我哋 demo 一次，教我哋要講啲咩、邊啲位要停頓、邊啲位合照等等，令到當日證婚嘅流程更加順暢。

最令我哋印象深刻嘅，係證婚人事前會問我哋嘅相識經過、平日相處同生活方式等等，然後整合咗一段真摯動人嘅文字嚟介紹我哋出場。佢將我哋平淡嘅愛情長跑描述得真實得嚟又唔沉悶，仲有種好幸福嘅感覺，等親友更加了解我哋嘅相愛歷程。證婚當日，佢温柔嘅聲線、恰到好處嘅節奏、動容嘅說話都令在場人士感動不已，我哋睇返相都見到好多人原來有感動到喊。

除咗證婚流程外，我仲問過證婚人其他結婚細節如選婚紗、歌曲等等嘅意見，佢嘅建議都非常實用，幫我解決咗唔少煩惱。另一半都好鍾意證婚人同團隊嘅服務，每個嘉賓都對我哋嘅證婚環節讚不絕口，為婚禮錦上添花。

如果要提一個小建議，就係希望證婚人除咗為新人綵排，都可以為雙方父母進行綵排，因為佢哋都會好緊張，未必清楚流程，有彩排會令整個證婚更加順利。整體嚟講，絕對值得推薦俾大家！