我係有朋友介紹先認識生誠教育，佢哋好似係有開班教人整氣球、雜耍嗰啲。我見近排有好多扭波比賽，呢間有出過比賽攞過獎，所以都冇咩擔心。而且我本身已經有搵deco公司，只係想搵佢哋加多少少嘢配合返deco公司嘅設計，要整嘅嘢唔多，所以一開始我Facebook搵佢哋，佢都好快quote到價錢比我，態度都好好。 佢哋幫我整咗啲大氣球係backdrop前面，襯翻本身deco公司嘅嘢。另外我march in證婚都喺酒店舉行，我就叫佢幫手整花柱係我march in條通道。當日出嚟效果好好，啲氣球令到deco公司嘅設計突出咗，生色不少！

呢間扭波公司係朋友介紹嘅，所以我哋冇再搵其他嘅比較。因為我同老公係中學同學，證婚個哋方就係中學禮堂，我就覺加埋氣球個佈置好似冇咁寡！我哋當日整咗個心心拱門，設計大部份都係佢哋suggest。其實我都係交哂俾佢諗，佢哋知道係禮堂之後，就估計樓底應該比較高，就幫我整啲識飛嘅波等等。我好似淨係叫佢幫我整鬆弛熊同XO公仔，佢都有Suggest可以加啲咩嘢等等。當日我去到佢哋已經set好哂嘢。我拎走咗XO同鬆弛熊，後尾咁啱好似有老師經過，問我哋可唔可以俾佢，所以就俾哂佢。 如果好鍾意卡通公仔，佢哋一定會扭到。因為我都有介紹俾朋友，結婚佢話要扭花師奶，佢哋真係扭到花師奶同花老爺，我覺得好神奇。佢哋都有整百日宴嗰啲，我都覺得好得意。