疫情下唔可以出國影相，但其實香港都有好多適合打卡嘅絕美婚攝場地！而且喺香港影婚照，可以返到大家相識、相遇、相戀嘅地方，流露出最真摯嘅幸福感，別具意義～ 以下 9 個本地婚攝小清新風格熱門取景地，既有香港「天空之鏡」，亦有富藝術氣息嘅紅磚牆，除咗影婚攝以外，亦係平日同另一半拍拖影靚相嘅好去處！
*温馨提示：請尊重自然環境，自己垃圾自己帶走。切勿為打卡而大聲喧嘩或影響居民，做好本分，一齊享受美好風景。*
文：婚享會編輯部｜圖：網上圖片
香港婚攝9大小清新風格取景地
1/ 南生圍
南生圍嘅靚景唔單止吸引雀鳥，近年仲有唔少攝影愛好者鍾意嚟影相，而當中嘅山林美景、蜿蜒河流同長木橋（婚紗橋）等亦成為婚紗相嘅熱門背景。而且途中必經嘅白楊樹路、被蘆葦草環繞嘅大片魚塘等，亦係電視劇經常取景嘅勝地。
Photo from Luna Wedding
2/ 獅子會
提起小清新，又點可以唔提獅子會！獅子會係近年婚攝嘅人氣熱點，大家都鍾意佢一大片樹林，俾人一種好似身處外國森林嘅感覺，而且遊人唔多，影出嚟亦有一種脫俗自然嘅感覺。
Photo from Luna Wedding
3/ 石澳
石澳有好多唔同嘅拍攝元素，既有石灘，又有沙灘、色彩繽紛嘅建築物等等，亦都可以選擇影夜景嘅星空婚紗相，啱晒有選擇困難症嘅你！
Photo from Luna Wedding
4/ 彭福公園
彭福公園位於沙田馬場跑道內圍中央，佔地廣闊，綠草如茵，係香港少數歡迎攜同寵物進入嘅公園，所以唔少有養寵物嘅準新人都鍾意同寵物一齊喺彭福公園影婚照，一齊拍低呢個浪漫時刻！
Photo from ewedding
5/ 牛棚
牛棚藝術村位於土瓜灣馬頭角道63號，前身係馬頭角牲畜檢疫站，即使而家化身藝術村，劃分成唔同嘅藝術家工作室，依然保留紅磚牆，而且藝術家都悉心喺工作室外種上花草，為牛棚增添唔少生氣！
6/ 下白泥
下白泥嘅醉人彩霞同「天空之鏡」一向吸引唔少人嚟潮聖，日落時份天空由澄藍變鮮橙，幸運嘅話仲會遇上彩霞，又靚又浪漫，即使#NoFilter都已經好靚！而且仲有好多特式建築，令你可以拍出唔同風格！
Photo from Luna Wedding
7/ 城門水塘
講起城門水塘，唔少人都會立即聯想到白千層樹林，樹林風景開掦，加上微風輕吹，恍如置身世外桃源，好適合拍攝一輯充滿仙氣嘅婚照！
Photo from Luna Wedding
8/ 西環街景
充滿特色嘅街道、塗鴉、特色小店等等，全部都可以係自然而浪漫嘅場景。喺呢啲場景下拍攝出新人嘅互動、小動作，令每張相變得更溫馨、耐看。
Photo from Luna Wedding
9/ 西貢沙灘
疫情下唔可以出國影婚照，但又想影陽光與海灘，不妨考慮喺西貢沙灘一望無際嘅大海同天空下，同另一半甜蜜互動，留下最美一刻～ 只要兩個人一齊開心影相，喺香港都可以營造出馬爾代夫嘅渡假感覺啦！
Photo from Luna Wedding
✨籌備婚禮由此囍✨全港最大的婚禮評語網站 Bespoke Wedding 婚享會，集齊最新結婚資訊😍即睇每月精選結婚優惠及獨家非凡禮遇🎁兼賺里數換蜜月機票攻略： www.bespoke-wedding.com/
