精選網誌

【婆媳糾紛】疫情下婆媳關係急速惡化!點先唔駛日日上演世界大戰?

Back to top

2020年07月19日 01:52:18

疫情下婆媳關係急速惡化!點先唔駛日日上演世界大戰?
疫情下唔少人都會Home Office,有啲仲因公司財困而失業,若果夫婦結婚後係同6299同住嘅話,大家日夜困獸鬥,自然會多咗好多爭拗⋯⋯ 早前好多人妻都喺Facebook page「我的極品四大長老」同「爆料公社」發文,講咗好多疫情下同6299嘅衝突⋯⋯ 有唔少網友睇完之後都相當有共鳴,仲提供咗唔少妙計,快啲睇下有無啱用嘅解救方法啦!

撰文:婚享會編輯部|圖片來源:網上圖片, Instagram

疫情下婆媳關係急速惡化!點先唔駛日日上演世界大戰?

疫情下婆媳關係急速惡化!點先唔駛日日上演世界大戰?

1/ 相見好,同住難!

當中有一位人妻,最初搬到去6299度住,有好多唔慣,例如佢哋唔會講煮唔煮飯、唔會因爲你返工早起身而夜晚早啲訓覺,又或者講嘢細聲啲,煮餸亦唔會少油少鹽,仲有好多好多⋯⋯ 呢位人妻最初會經常同老公同媽咪呻6299嘅奇怪嘢+壞習慣,後來經佢哋開解後,佢突然醒覺⋯⋯

化解方法:「將心比心」、「有同理心」!

6299年紀其實都唔細,只要仔細留意佢哋,會發現佢哋只係唔知點同自己溝通~ 例如因為年紀大咗先會訓得少,因為味覺退化先會煮餸煮得咸咗,因為聽力差到接近撞聾先會講嘢同睇電視都好大聲⋯⋯ 後來呢位人妻開始同6299傾偈,了解佢哋。6299慢慢願意嘗試食嘢清淡啲、講嘢細聲啲,甚至而家6299仲錫佢多過老公!呢位人妻嘅成功例子,令佢明白6299喺唔同年代長大,習慣完全唔一樣,亦唔會知要點同自己相處,唔會好似爸媽咁遷就自己、愛自己。只要試下多啲同佢哋傾偈,總會有改善空間!好多網民都表示同意,仲話最緊要係「將心比心」、「有同理心」!

 

疫情下婆媳關係急速惡化!點先唔駛日日上演世界大戰?

2/ 6299成日自出自入?

就算唔係一齊住,另一人妻亦反映另一個地雷:6299成日突然殺上嚟,自出自入!呢位人妻屋企係用電子鎖,唔知點解老爺奶奶知道個密碼,但有一日佢哋明知新抱喺屋入面,依然自己用密碼入屋,而且已經唔係第一次,令呢位人妻不禁反問其實屋主係邊個⋯⋯ 唔少網民都好有共鳴,仲話佢哋咁樣做好唔尊重自己。

網民建議:俾另一半感受下外父外母成日突擊上嚟!

有網民建議:「密碼如果要俾,就要俾晒兩邊父母咁樣先公平。可以試吓夾埋外父外母突擊上嚟開門探個女,要俾另一半感受一下,如果另一半覺得無問題嘅,咁就冇嘢講,但如果另一半有說話講,咁就可以順理成章咁將件事拎出嚟大家傾啦。」佢仲話其實好多另一半都成日覺得自己老婆同自己阿媽相處唔會有問題,咁不如試下倒轉諗,自己同外父外母相處多啲/佢哋成日突擊上嚟,睇下會唔會有問題?都係嗰句,將心比心,大家又點睇?

 

疫情下婆媳關係急速惡化!點先唔駛日日上演世界大戰?

3/ 6299嘅衛生習慣接受唔到!

疫情下更有人妻接受唔到6299嘅衛生習慣,特別係有小朋友嘅話,就更加在意!有一位人妻本身兩公婆自己住,但有咗小朋友之後就搬返去同6299住,但疫情下就係惡夢嘅開始⋯⋯ 佢講到62本身衛生意識真係好一般,平時咳同打噴嚏都唔係好掩口,而且一收工返屋企就好鍾意著住對鞋成屋行,又唔換衫⋯⋯ 又唔洗手⋯⋯ 一返嚟就即時衝去房門口同佢小朋友講嘢,重伸手喺小朋友面前扮話拎佢隻公仔,小朋友仲要未夠3歲⋯⋯ 雖然99已經出到聲叫62出返嚟,平時亦成日叫62要注意衛生,但反而俾62話返轉頭⋯⋯

網友獻計:利用群眾壓力叫佢做曬一系列消毒過程

有網友就獻計,話佢唔做你哋自己做,返屋企時大大聲扮教小朋友要除鞋先入屋,洗手換衫消毒,如果62衝入房,就叫小朋友問阿爺:「你返嚟洗咗手未呀?換衫先啦~」,雖然未必有用,不過唔駛同佢嘈,又叫做表達咗意見,利用群眾壓力叫佢做曬一系列消毒過程,如果咁都唔聽,就唯有消毒方面再做多啲~ 亦有網友話接受唔到唯有搬,始終老人家生活咗幾十年,好多價值觀同生活習慣都唔係一時立即改到~ 大家又認唔認同?

【婆媳糾紛】疫情下婆媳關係急速惡化!點先唔駛日日上演世界大戰?

疫情下婆媳關係急速惡化!點先唔駛日日上演世界大戰?

4/ 老公做家務,99話會搞壞佢身體?!

有人妻仲自爆,當老公喺屋企幫手做家務嘅時候,99竟然同佢講︰「你要體恤你老公返工辛苦,做到嘅就做,老公幫你係體恤你,但係返工咁辛苦,放工仲要幫你洗衫、晾衫,咁樣會搞壞身體;老公身體搞壞咗,辛苦嗰個係你,唔好話我無提醒你。」講完未夠3分鐘,99仲突然大聲講:「快啲拎啲衫去洗。」令呢位新抱極之不滿:「原來男人洗衫晾衫會身體唔好,呢個係咩邏輯?」

網民分享:一齊分擔,先係增進感情嘅最佳方法!

好多網民睇完之後都為新抱抱不平,紛紛講到:「而家係咩年代?」、「幫手做家務唔係應該嘅咩?」有一位媽媽仲留言分享,話無論男女,自細都應該訓練佢哋做家務,可以訓練佢哋獨立自主。男人亦應該幫媽媽、姐妹,甚至老婆做家務,咁樣係象徵愛嘅表現,可以促進彼此感情,而且會做家務嘅男人亦會大大加分,一齊分擔,先係增進感情嘅最佳方法!

籌備婚禮由此囍✨全港最大的婚禮評語網站 Bespoke Wedding 婚享會,集齊最新結婚資訊😍即睇每月精選結婚優惠及獨家非凡禮遇🎁兼賺里數換蜜月機票攻略: www.bespoke-wedding.com/

gif