婚禮唔單止有十萬樣嘢要煩，一唔小心，仲會引發十萬樣垃圾！其實只要事前細心安排，低碳婚禮環保之餘，仲可以好得體、好浪漫！想知點造先可以時尚地帶出呢份咁有意義嘅綠色浪漫？即睇以下8大重點！
撰文：婚享會編輯部｜圖片來源：網上圖片、Instagram
1/ 使用電子請帖！
環保由婚前做起，第一步當然由請帖出發！宜家越嚟越多人透過電郵或社交網站發放e-invitation，而呢種做法喺疫情影響下亦越嚟越流行！不過若果真係需要俾實體請帖嘅話，不妨以廢紙再生而成嘅環保手造紙製作，亦都係唔錯嘅環保喜帖選擇之一！
Photo from Instagram @ken___hui
2/ 戶外低碳婚宴！
近年流行嘅戶外婚禮，其實都係綠色婚禮嘅一個重要元素～ 因為戶外婚禮有天然陽光照明，唔駛出動燈、冷氣等耗電器材，節省能源；而且戶外婚禮往往有一大片草地或天然植物陪襯，唔需要大量鮮花布置，減少浪費～
3/ 乘搭公共交通工具！
汽車係排出二氧化碳嘅元兇，婚禮前不妨鼓勵賓客乘搭公共交通工具，又或租一架派對旅遊巴，響應環保，盡量減用車輛。
4/ 輕食、素食飲宴！
婚宴大排筵席，預備太多食物，往往會衍生更多廚餘⋯⋯ 除咗可以將廚餘送到食物銀行，亦可以嚟一場輕食飲宴，實行源頭減廢！喺菜式選擇上，唔少低碳新人都會選擇有機食物同素菜，當然唔少得純素結婚蛋糕！純素蛋糕可以保護環境之餘，亦可以照顧到素食者同有食物敏感嘅賓客，而且越嚟越多純素蛋糕都好味又精緻，絕對唔失禮！
5/ 實行走塑婚宴！
除咗素食餐單之外，新人亦可以實行走塑婚宴，喺婚宴前請大家當日帶備環保容器作打包，減少浪廢食物，同時減少使用即棄餐具。而且亦可以用剩布車製小手巾，俾賓客用餐時用嚟抹嘴，減少使用紙巾，又或者當杯墊用，晚宴結束後仲可以俾大家帶返屋企～ 不過實行呢啲大計之前，一定要俾賓客提早知道呢個係一場綠色婚禮，等大家都有準備，同時減低賓客嘅不便～
6/ 唔用噴髮膠！
行禮嘅時候，可以選擇以自然髮型示人，又或減少使用損害臭氧層嘅噴髮膠，令新娘子更加脫俗自然～
7/ 借得就借、循環再用！
搞婚禮往往會浪費好多一次性嘅物資，增加大量垃圾，不妨借得就借，多用出租或者再用物資，好似現場嘅布置、花球等，最好循環再用，將物資傳俾下一位新娘，就好似幸褔嘅傳承一樣～
8/ 以多肉植物取代鮮花！
鮮花保存期短，所以而家有唔少新娘都以多肉植物代替鮮花，製作結婚花球～ 製作時會以少量泥土包好多肉植物，到返屋企後只需小心拆除再移植入盆，就可以延續植物嘅生命！而新人更可以將多肉植物小盆栽布置場地，婚禮後就邀請親友帶走，當作回禮小禮物，將婚禮喜悅延續！
Photo from Instagram @ken___hui
其實一場婚禮最重要都係用愛完成，與其製造一大堆垃圾，不如花小小心機，物盡其用，令呢場綠色婚禮環保之餘又有意義，將呢份愛延續落去！
div class="bw_blog_ads">✨籌備婚禮由此囍✨全港最大的婚禮評語網站 Bespoke Wedding 婚享會，集齊最新結婚資訊😍即睇每月精選結婚優惠及獨家非凡禮遇🎁兼賺里數換蜜月機票攻略： www.bespoke-wedding.com/
