近排經常在家抗疫，唔少B2B都話留喺屋企好容易就食多咗，特別係薯片蝦條，佢哋唔單止高脂，早前消委會更測試市面上77款香脆零食樣本，發現70款樣本均含有可致癌物質「丙烯酰胺（acrylamide）」，所以都係少食為妙！口痕嘅話，不妨自製同樣好味又健康嘅Superfood健康減肥餐，食得健康，皮膚都靚啲！
撰文：婚享會編輯部｜圖片來源：網上圖片, Instagram
牛油果、紅菜頭、秋葵 減得健康又好味！
Superfood 1/ 牛油果
牛油果有營養就好多人都知，但原來牛油果核都一樣有益！用牛油果核沖茶飲，可以減肥又可以用盡成個牛油果，關鍵在於牛油果核含豐富嘅水溶性纖維，有助改善腸道健康，水溶性纖維同油脂物質結合，促使脂肪排出體外～ 而且飲牛油果核茶，可以令減肥者多飲水，呢個亦係成功減磅嘅原因～ 佢針對中央肥胖、代謝較慢同氣滯型肥胖人士都比較有用，不過要注意，牛油果核茶唔係人人啱飲，若果你有腎病、低血糖、低血壓、有心臟病同服用傳統薄血丸嘅話，都不宜飲用。
食譜：3步做好牛油果核茶！
1/ 先將牛油果核切片
2/ 將1粒份量嘅牛油果核切片加入1升清水，慢火煮30分鐘
3/ 加一點檸檬汁調味即成！
Superfood 2/ 紅菜頭
紅菜頭低卡路里，而且含有豐富嘅非水溶性纖維，可以增加飽肚感，適合減磅時食用。而且運動前飲紅菜頭汁，仲可以有助增加血液同氧氣運送到肌肉當中，增強運動時嘅耐力。一般建議飲用份量係每星期兩至三次，每一次約半杯（100毫升）。不過如果你血壓低，有糖尿病、腎病、腎功能有問題，甚至有腎石的話，就唔適合飲用太多！
食譜：紅菜頭燕麥早餐
材料： 紅菜頭汁半杯（約100毫升）、燕麥片約半杯、低脂奶／脫脂奶一杯（250毫升） 奇亞籽一湯匙、士多啤梨1/3杯、香蕉半隻、適量蜜糖
做法：
1/ 預備一個玻璃樽，前一晚放入燕麥片。
2/ 將紅菜頭汁、低脂奶／脫脂奶、奇亞籽攪好，倒入玻璃樽內蓋過燕麥片。
3/ 再喺上面加上香蕉同士多啤梨，然後重覆步驟，做成幾層嘅效果～
4/ 最後放入雪櫃雪一晚，第二朝就可以食喇！食嘅時候可以加入少少蜜糖調味～
Superfood 3/ 秋葵
秋葵脂肪低、熱量低，8條秋葵只有約31個卡路里！而且半碗秋葵已經等於兩個蘋果嘅纖維量，用嚟代替薯片、朱古力當作零食，低卡路里又飽肚！而且喺烹調方法方面，麻醬秋葵都係一個唔錯嘅選擇，大火煲滾秋葵後放入冰水中冷卻，撈起瀝乾，再加上低脂芝麻醬，已經係一款美味低脂小食，總比肥膩嘅油炸或燥熱嘅烤焗方式好～ 不過要注意，血壓低或有腎病嘅人，又或腸胃比較弱嘅人，都要特別留意食用份量，最好當然向註冊營養師或醫生查詢適唔適合食用啦！
食譜：秋葵炒蛋
材料： 秋葵8條、雞蛋2隻、鹽 1/3茶匙
做法：
1/ 將秋葵洗乾淨，抹乾後將佢切片。
2/ 將雞蛋同鹽加入碗中，攪勻後將秋葵加入蛋漿。
3/ 喺平底鑊入面加入1茶匙油，再加入秋葵蛋漿，炒至全熟就OK喇！
✨籌備婚禮由此囍✨全港最大的婚禮評語網站 Bespoke Wedding 婚享會，集齊最新結婚資訊😍即睇每月精選結婚優惠及獨家非凡禮遇🎁兼賺里數換蜜月機票攻略： www.bespoke-wedding.com/
