疫情下唔少人都選擇先證婚後擺酒，選擇喺空氣較流通嘅戶外草地，舉行一場夢幻嘅戶外婚禮～ 喺大自然美景見證下踏入人生另一階段，畫面的確相當唯美～ 但其實戶外婚禮都有唔少注意事項，而且仲有唔少準備功夫！只要喺賓客角度出發，細心照顧佢哋所需，呢場婚禮自然可以更加完美！
文：婚享會編輯部｜圖：the vow, Gold Coast Yacht & Country Club
Photo from Gold Coast Yacht & Country Club
1/ 考慮天氣因素！
舉行戶外婚禮，最重要當然要顧及天氣問題！為避免新人同賓客汗流浹背，最好安排陽光唔係最猛烈嘅時間舉行，例如下午4至6點～ 而現場亦要有足夠配備，好似遮擋陽光嘅帳篷、戶外冷風機等等，令賓客唔會太熱、太辛苦。如果天氣預報話會落雨嘅話，當然亦要預先為賓客準備雨傘，而且最好係透明直傘，咁樣就唔會阻擋視線，而且直傘也比較鞏固同容易控制！
Photo from the vow
2/ 留意戶外佈置細節！
戶外婚禮嘅佈置亦係重要一環，既要了解裝飾細節以免貨不對版，亦都要留意突發情況下嘅應變措施，例如因颱風、黑雨或其他原因改期，會係點樣處理？需唔需要附加費？呢啲都要事前問清楚！
Photo from the vow
3/ 預先測試好燈光同音響！
戶外婚禮嘅燈光同音響都好重要，日間婚禮要檢查好現場音響，以免出現無聲或聲浪太大／太細嘅情況～ 若果喺夜晚舉行婚禮嘅話，除咗音響之外更要留意燈光：既要同攝影師好好溝通，希望影相效果更靚～ 亦要喺各個地區俾賓客有足夠照明，咁先安全又安心！
4/ 證婚儀式最好沿用長枱！
戶外婚禮嘅配套亦相當重要，因為證婚儀式時桌面上需要放唔同文件，所以最好同場地嗰邊溝通好，準備長枱～ 因為新人當時著住婚紗禮服，而證婚人亦需要坐得舒適，所以最好盡量唔好用高枱或BAR枱！
Photo from Gold Coast Yacht & Country Club
5/ 注意大型佈置裝拆技術、時間
有唔少新人想環保又或想慳錢，都想戶外證婚後將大型佈置搬到晚宴場地重用，但要注意千祈唔好諗得太簡單～ 當日大家都會非常忙，而且要顧及大型佈置嘅裝拆技術同時間。避免喺重要日子出錯，呢類安排都係可免則免～
戶外婚禮必備小物！
1/ 方便舒適走動！拖鞋
喺戶外舉行婚禮，可能喺草地，亦可能係海邊，但大家著住高踭鞋參加你婚禮，就變得可能唔係咁方便～ 所以新人可以預先準備一啲拖鞋俾賓客，等佢哋行得攰，都可以坐低更換，輕鬆舒服參加你嘅婚禮！
2/ 消暑良品！風扇
春夏喺戶外搞婚禮會擔心賓客感到悶熱，所以新人可以事先預備一啲棕櫚木扇／風扇仔俾賓客，等佢哋可以消消暑～
3/ 最強防曬孖寶！太陽帽＋太陽遮
戶外婚禮遇上好天氣當然開心，不過有賓客可能皮膚比較脆弱，容易曬傷或曬紅～ 只要預先準備太陽帽＋太陽遮俾佢哋，就可以幫佢哋加強防曬效果啦！
Photo from the vow
✨籌備婚禮由此囍✨全港最大的婚禮評語網站 Bespoke Wedding 婚享會，集齊最新結婚資訊😍即睇每月精選結婚優惠及獨家非凡禮遇🎁兼賺里數換蜜月機票攻略： www.bespoke-wedding.com/
