精選網誌

【抗疫新人】抗疫新人改期/撻訂真實個案 (內附Book期案情及重點提示!) 新人真實個案投稿 B2B必睇!

Back to top

2021年04月01日 16:48:21

【抗疫新人】抗疫新人改期/撻訂真實個案 (內附Book期案情及重點提示!) !新人真實個案投稿 B2B必睇!

繼早前報導過新人CM珊的故事之後,我哋陸續收到唔少新人投稿,當中好多新人都反映出籌備婚禮時嘅「辛酸史」,亦有好多值得學習嘅地方~ 今次我哋就將呢啲新人故事輯錄落嚟同大家分享,希望大家可以從中學習當中要點,一齊喺「疫」境之中共勉之!

撰文:婚享會編輯部|圖片來源:網上圖片

 

 

 

【抗疫新人】抗疫新人改期/撻訂真實個案 (內附Book期案情及重點提示!) 新人真實個案投稿 B2B必睇!

1/ 化妝師改期3次堅持殺訂!要移民又唔肯Refer其他行家俾客!

新人:Fung(化名)
背景:拍拖4年,希望快啲結婚,好想快啲有小朋友。
婚期:由今年3月改至6月

故事:「疫情期間本身問咗化妝師可唔可以改期,佢答可以,但從來無提過收費/可以改幾次/時限等字眼。我改第1次時無收費的,改第2次就話要收$5,000(爭論後只收$1,000),改第3次時就話唔俾改,要殺訂!但由始至終,佢都無講過會收費/有殺訂嘅情況發生!最後我改期唔成功,化妝師堅持唔俾改要殺訂⋯⋯ 化妝師所有收費細則完全唔清晰,甚至無提過,一句話殺訂、無得改,就沒收咗啲錢。相反,我租車果到聽到我改期第一句係:唔好唔開心,即刻幫你睇有無期,今次唔收你費用,你改咁多次期負擔都好大,我哋盡量幫你啦⋯⋯ 最爆係原來佢最後決定要移民,但又唔肯Refer其他化妝師俾客,處理得極差,好多佢嘅客都嬲到癲咗!要移民大家都明白體諒,但唔係大晒!」

給B2B的溫馨提示:「因為化妝師好多時都係『個人』,並唔係一間『公司』,所以大家俾錢時一定要問清楚改期方面收費、可以改幾次,之後再收幾多錢、最多改幾次等問題,先可以保障到自己!」

【抗疫新人】抗疫新人改期/撻訂真實個案 (內附Book期案情及重點提示!) 新人真實個案投稿 B2B必睇!

2/ 佈置公司肆意更改合約條款!

新人:Sum(化名)
背景:拍拖2年,原定於今年1月舉行婚禮。
婚期:由2021年1月改至3月,再延期到今年12月

故事:「當初佈置公司講到明只需要兩星期前通知改期,就唔駛收改期費。但當第二次改期時,佈置公司竟然通知我哋改咗合約條款,每次改期收取$3,000,並要一個月前通知!佈置公司肆意更改合約條款,更加離譜!佢哋話,除非政府宣佈要「完全禁止擺酒」,先係「不可抗力」嘅因素,先唔會有任何改期費用。但政府只係禁晚市同限制人數,即係可以擺而唔係禁止啦!唔通我要10圍120人嘅酒席費用,用於20人婚宴?最後同佈置公司爭論完後,公司先願意退訂金,解除合約。」

給B2B的溫馨提示:「喺俾訂金時,商戶要喺合約清楚寫明改期費用係幾多、可以改期到幾時、通知期係幾耐?咩情況下商戶會殺訂?撻訂時尾數需唔需要由新人承擔?喺政府限制宴會時間同人數嘅情況下,可唔可以退返訂金?訂金可唔可以轉作其他用途,例如消費券? 呢啲全部都要『白紙黑字』寫喺合約上,以防日後爭執。最好新人保留商戶嘅信息對話同電話錄音,作為日後保障自己權益嘅證據。新人唔好輕易相信商戶嘅口頭承諾,當遇到不合理更改條款時,要勇敢爭取自己嘅權益!」

【抗疫新人】抗疫新人改期/撻訂真實個案 (內附Book期案情及重點提示!) 新人真實個案投稿 B2B必睇!

3/ 個個都收改期費,好灰!

新人:Jane(化名)
背景:拍拖8年,結束愛情長跑,終於同另一半拉埋天窗。
婚期:由2020年10月,改到今年3月,再改至今年9月

故事:「差唔多我用親嘅每個商戶都要收改期費,但之前又無講清楚,令我覺得好灰⋯⋯ 我用嘅攝影師一開始話改期費要收$3,000,但經過一輪商議後,佢都好同情我免咗我呢個費用,下次再改我都同意俾改期費。但化妝師改期最無理,每次都話要收20%改期費,一次都唔減免,我話下次再改我一定俾都唔得,真係好嬲!最後我忍唔住,撻咗佢訂!」

給B2B的溫馨提示:「記住!記住!記住!Book之前唔好俾佢哋嘅作品吸引咗就盲舂舂落訂/簽約,但事前咩都無問清楚!就算問咗,對方有口頭承諾,都一定要以書面記錄!將來唔駛口同鼻拗,有爭拗時亦都有所憑據!」

 

 

4/ 聽朋友講好多場地都當新人水魚~ 我不想努力了⋯⋯

新人:仙(化名)
背景:拍拖1年,雙方都有共識想結婚,但因為疫情反覆,暫時唔想再搞婚禮⋯⋯
婚期:暫定今年年尾

故事:「我係2021新人,1月決定結婚,點知疫情反覆,而身邊好多呢一兩年結婚嘅朋友,疫情下都搞到一鑊粥⋯⋯ 聽過好多結了婚的B2B講場地當新人係水魚,試過俾晒訂金之後因為疫情想轉形式搞,但一開始任何Discount都唔俾,仲要新人重新俾過錢先可以轉,真係好過份!佢哋要人發脾氣先肯講優惠、先有啲『緊貼情況』嘅Package,完全當我白痴,唔知市況咁!聽完朋友講之後心情都好差,本來想細細地搞,但而家搞到我都唔想搞住。明白場地都難做,但咁樣對客,之後都好難做生意。」

給B2B的溫馨提示「記住睇場時最緊要做功課,睇多啲Group問多啲朋友和B2B,一定要唔可以懶!」

揀商戶前做足功課 睇清楚背景資料!

聽完咁多位B2B分享改期/撻訂嘅血淚史之後,各位準備開始籌備婚禮嘅B2B,記得要Mark低所有「溫馨提示」,避免重覆犯錯!揀商戶前可先睇清楚佢哋嘅背景資料,同時亦應問清楚所有改期、合約細節,並以書面記錄,希望大家都可以共勉之,順利籌備心中理想婚禮!如果大家都有其他個案想同我哋分享,歡迎隨時Inbox我哋報料!

【抗疫新人】抗疫新人改期/撻訂真實個案 (內附Book期案情及重點提示!) 新人真實個案投稿 B2B必睇!

 

籌備婚禮由此囍✨全港最大的婚禮評語網站 Bespoke Wedding 婚享會,集齊最新結婚資訊😍即睇每月精選結婚優惠及獨家非凡禮遇🎁兼賺里數換蜜月機票攻略: www.bespoke-wedding.com/

gif