知道麗豪酒店係因為之前我有啲朋友都喺嗰度擺過酒，但我本身first priority唔係揀佢哋嘅，係因為本身落咗訂嗰間場地出咗啲意外，所以就即刻睇麗豪11月有無位，好好彩佢哋都有😆。但係真係好趕，係婚期前兩個禮拜內嘅事，我係通過麗豪嘅網站send email聯絡佢哋嘅，佢哋都好快俾咗feedback我。同我對接嘅sales Phoebe都做得好好，因為佢知道我嘅情況，好多嘢都幫我好urgent咁做，俾咗好多意見我。因為婚期太近，我好多嘢例如酒店嗰啲都已經book好晒，本身嗰個package會送相同嘅嘢，Phoebe都有諗到我哋應該已經book咗，就主動offer轉其他嘢俾我哋，同埋包咗嘅三架車佢都會幫我哋諗好啲上車時間，真係好多嘢都好上心，我都好放心交俾佢😊。我哋係喺whatsapp聯絡嘅，因為我有啲嘢好趕急咁去做，咁佢都會覆得好快，就算佢放假都會有其他同事幫手，follow得好好。我有啲物資都可以提早放喺佢嗰度先，咁我啲時間就可以靈活好多啦。我哋係搞晚宴嘅，嗰晚會有個staff貼身跟住我嘅，每個親友有唔同嘅要求，佢都會即刻幫我解決啲問題。我有同佢講個rundown好急，因為我想快啲完俾啲賓客離開，佢都好幫手。譬如喺我家族七十幾人影大合照嘅時候，等得耐大家都有少少鼓噪，咁佢都會用佢嘅方法安撫返佢哋，幫我哋排好晒位，希望我哋可以儘快完成。唯一不足嘅地方就係佢哋嘅門面會舊少少，如果裝修下就更加好啦🙈。我覺得唔知自己要做啲咩嘅新人就最適合佢哋啦，因為佢哋follow up得好好，會俾好多意見，package送嘅嘢包括車同蛋糕都係好啱用嘅。雖然佢哋唔算係喺港鐵站沿線，但佢哋都會依照圍數送旅遊巴，喺開席或者結束嘅時候接送賓客，都解決咗佢哋自己嘅缺點啦👍🏻。

我同先生都係想揀酒店做婚宴場地嘅，想搵間價錢相宜嘅酒店，同埋睇咗地點，因為我哋一個住屯門一個住上水，就揀咗個中間點喺沙田啦。咁我哋搵咗沙田嘅幾間酒店，得麗豪酒店做到我哋想要嘅廿零圍，其他酒店都淨係做到十零圍。我哋係11月擺酒，係2月落咗訂到11月期間佢都約咗我哋見三次面，每一次係傾唔同嘢嘅，最接近婚期嗰次佢哋係直頭幫我哋諗埋成個流程，幫我哋安排好幾點要轉場同切蛋糕嗰啲。因為我哋唔係好熟悉，又無咩參考，咁佢哋都俾咗啲建議我哋，我哋都接受咗，都覺得幾有用👍🏻。去到婚宴當晚，因為我哋比較遲，七點幾先證婚，又想早啲開席，部長都好就得我哋嘅要求，俾建議我哋改兩次進場做一次，最後就可以八點正式開席。同埋當晚餸菜都上得好快，有足夠時間俾大家食到又唔會隔太耐，賓客都有讚啲嘢食好食😆。最後走嘅時候酒店都有安排旅遊巴送我哋，都唔洗我哋擔心。不過約見嘅三次係佢哋俾期我，就話大概幾多月就去搵佢哋，都係要我去主動聯絡，佢哋就好少聯絡我。我用e-mail搵佢哋，佢哋都會即日覆返我，之後仲有俾公司嘅whatsapp我，就更加方便搵到佢哋，但係如果佢哋可以改善下，主動聯絡我同我講邊日去見面就更加好啦🙈。