記得當時搵咗好多個攝影師俾我老公揀，而啲所謂大師級既都好多，而當我哋喺上去同Tanarak傾過之後，我老公就已經話「其他嗰啲都係唔使見喇！」。我覺得我老公睇人都好準，而且我哋兩個都覺得同Tanarak個性格都好相近似而啲諗法都差不多，我諗同佢相遇都可以講得上係一種緣份。 到咗Big Day嗰日，原來除左佢之外仲有另外一位好有經驗嘅攝影師响佢隊crew裡面，不過因為我其實唔清楚嗰日原來會有另一個攝影師加入幫手，當時見到多咗個人都嚇咗一跳！始終之前prewedding都係搵咗Tanarak知道佢嘅技術同埋夾唔夾，但另一位攝影師就無合作過，唔知佢啲攝影技術係點。之後我再問返我老公先知其實佢都知會有另一個攝影師，原來係得我一個唔清楚～！我諗如果喺呢種情況下，佢之前email晒我哋兩個，早啲講邊個會負責做啲咩，有事要問邊個之類咁我就會有多啲有心理準備。不過我都明可能因為big day嗰日好多人，地方又多咗，就需要有多一個攝影師，不過唔好誤會，其實呢一位攝影師態度都真係非常專業既！兩位攝影師對我哋同啲親戚朋友都好好禮貌而我爸爸媽媽都話覺得佢哋每個人都好專業。 我哋喺HYATT擺酒，所以除左朝早喺酒店嘅一啲活動，我哋中間仲有啲時間可以出去影相。因為我同我老公係喺中文大學度識，HYATT同中大又近，我哋就返咗中大度影相而都無時間再喺HYATT影戶外相。嗰段時間兩位攝影師都跟我哋一齊出去。即使去到中大佢哋攞景都好準，我哋俾左幾張我哋以前喺中大嘅獅子亭同天人合一亭度影過嘅相佢睇，佢好快就幫我哋攞返同張相一樣嘅景。到晚宴嗰時佢哋真係好貼身，人釘人咁，盡量所有細節都幫我哋影到晒。我記得我一上台另一個攝影師就會即刻準備好，然後Tanarak又會幫我capture啲special moment，我見佢哋合作得好好。不過因為暫時我只係收返朝拍晚播嘅片，未收到big day啲相所以都唔可以俾到太多意見，但手頭上見到嗰啲都已經覺得唔錯。

初頭其實我只係搵咗Tanarak幫我哋影big day，因為知道佢big day都收得唔平，所以嗰時我哋都無諗住要影prewedding。不過後來我上過佢嘅Studio度傾嘢，睇到佢嘅作品就已經感動到喊咗！Tanarak 啲作品唔會一式一樣，真係好影到每對couple嘅style出嚟，睇睇吓仲睇到我朋友影出嚟嗰啲相，都真係好靚。之後傾傾吓，佢就話佢會去一去歐洲，我哋咁啱又有一個長假期諗住去遠啲嘅地方旅行，於是佢就問我哋有無興趣約埋喺歐洲嗰邊幫我哋影。因為佢原先已經會喺歐洲，約埋咁影就可以平啲，唔使再額外俾佢嘅機票錢，於是我同我老公就再返去考慮吓。不過，其實我老公見到我睇sample都睇到眼濕濕就話「呢次無得走架喇，都係一定要搵佢喇。」。我覺得我哋同佢都可以話係一拍即合，而且我睇過佢啲作品都覺得好滿意又覺得佢都好友善，完全無hard sell嘅感覺，就決定咗搵佢幫我哋影prewedding。 因為佢係泰國人，母語唔係廣東話，所以我哋都會準備好啲，會事先傾下到時喺法國影相各樣流程係點。有時佢都會主動問我哋關於一啲安排上嘅嘢，我覺得我哋同佢溝通都好好，無問題，各樣嘢都好清晰。我哋主要同佢喺用英文溝通，我同我老公用英文溝通都OK，所以成個過程都好smooth。雖然佢只係一個攝影師，但佢都好主動幫我哋搵下法國嗰邊租衫可以搵咩人，加上Tanarak自己喺法國嗰邊住過，都有啲network可以問。不過後來我哋都係諗住簡單啲喺香港帶啲衫過去，佢就再幫我哋搵嗰邊嘅化妝師。之後佢又叫我哋睇下有無咩地方係好想影，又俾咗啲景點嘅提議我哋。佢建議我哋可以上網睇吓其他人喺法國去邊到影，會唔會鐘意嗰啲景。最後我哋傾完之後，就揀咗我自己比較鐘意有樹有陽光嘅地方，同埋一啲法國出名景點。 我哋喺7月去法國，我記得嗰日真係好熱！嗰日朝早佢嚟我哋酒店房嗰度搵我哋做準備，跟住化妝師嚟到先幫我哋化妝，大約係10點左右。因為當時係法國夏天日照時間好長，所以我哋都遲咗出去，Tanarak佢有個助手幫我攞埋晒啲嘢，差不多12點幾1點就出發去影相。嗰日化妝師有跟埋我哋出去，但其實對化妝師嚟講都好趕同辛苦。於是我同Tanarak商量完之後都同化妝師講最緊要係quality而唔係quantity，同埋可以享受到影嘅過程，唔使換好多妝。我記得即使咁熱，佢都好細心咁take care我哋又唔會投訢話好熱好辛苦，態度好好。 諗返影相嘅過程，其中一個我哋會揀Tanarak嘅原因都係因為佢唔會叫我哋去擺一啲好特別嘅pose，呢樣係我同我老公都好滿意嘅地方。佢唔會好似某啲攝影師咁話叫我hold住個pose俾佢影下先或者要做影前嘅rehearsal。其實我同我老公都好多幾即興嘅同作，有時忽然間跳吓，傻笑吓，又或者會整 "V" 手勢，但佢都會照影，所以影嗰時真係好舒服同好有我哋自己嘅風格。而且我哋好怕啲攝影師唔聽我哋意見，但佢就完全唔會咁。另一方面，我哋之前唔知佢嘅背景，只係見佢影啲相好靚，原來佢係一個建築師！！真係高 quali 到被佢嚇親！不過我諗就係因為佢有呢一個背景，佢每到一個地點都會落車先，然後叫我慢慢嚟唔使急。佢自己就會行吓睇吓個環境，到我哋嚟到一影，佢就已經capture到邊度攞個境係最靚。嗰日我哋都見到好多其他攝影師幫人喺法國影婚紗相，我特別記得嗰晚去到羅浮宮嗰度，當我哋已經影咗好多位置嘅時候，其他嗰啲攝影師影嚟影去都仲係嗰啲位，嗰時我就覺得我哋真係揀啱咗攝影師！佢又快手，影啲角度又靚！呢個旅程真係好開心，唔止係影相，都係一個好快樂嘅回憶！ 返到香港揀相，佢整咗一個Album將所有佢幫我哋影嘅相寄俾我哋，真係好多張！以前我哋見過有啲人影出嚟啲相會喧賓奪主，個景仲大過個人，但我哋影出嚟嗰啲就完全無呢個問題，兩邊都突出到，人同景都好靚。之後我哋兩個先慢慢喺嗰一大堆相再揀邊啲我哋想整落相簿。佢俾咗好多相簿style嘅sample我哋睇，有啲係普通，有啲係特別靚既，我哋就揀咗靚啲嘅version，仲揀咗紙。至於揀相嗰方面，我哋都揀咗好幾round先finalize到，因為一開始佢叫我哋揀80張，但因為啲相真係太靚，我哋都揀多咗。不過，佢幫我哋剪輯好個相簿再俾我哋睇嗰時，我哋就覺得唔係咁靚，於是就同佢講都係減返一啲相。佢聽完都無話我哋又好快幫我哋改好，最後來來回回佢幫我哋改到第三個version先攞出去印相簿。 一睇到個相簿嗰下，我老公即刻好興奮咁話「very good!」。我自己見到個成品嗰下都好開心，因為由soft copy到個成品出到黎都同我心入面諗嘅好相似，好靚。我印象最深刻嗰一張相就係我哋喺巴黎鐵塔前跳起嗰一張。嗰一張相好capture到我哋嗰種傻傻哋好開心嘅性格，而我哋喺嗰個好靚嘅哋方著住婚紗影到呢一張相就覺得係一個好美麗嘅moment。如果「服務承諾達到」嗰部分同「整體滿意度」可以俾6分嘅話我會俾6分！