我地有上網睇過啲package既，又有睇過Grand Hyatt, Conrad, Marriott, Harbour Grand，Langham, Marco Polo 而都又諗過Four Seasons 同 Ritz Carlton,不過呢兩間真係太貴啦。 其實我地都主要想搵間好食既。我地自己上網搵check咗文華啲資料，因為發現佢好少參展。但後來又見佢參加婚展，但就唔覺佢係婚展有平到喎，根本無平過。我哋本來由一個叫Cheryl Mok既經理負責，因為我地好早就book咗，後來佢哋人事調動轉左呀Carol，過程都smooth既，服務都好。 當時confirm咗有安排試菜，而佢哋係只包唔駛全圍上既菜式，即係無魚同無雞既。試菜係唔包酒，但因為我地想試晒所有菜式同埋酒（因為想知道啲house wine 得唔得）。所以除咗條魚之外（因為話如果要試埋魚既話要多收＄5000！），加咗啲錢就連酒都可以試埋。 我地擺左20圍，個場幾好，唔洗點整decoration，佢包backdrop同stage既牌。On day 當日對我地好好，佢哋當晚會熱番啲食物送上房俾我地。整晚亦都一定有一個同事跟住我地，但呢個同事有時係會轉其他人既。佢哋啲permanent staff 係ok既，但有一期個橙衫職員踩咗我條裙，踩到我直頭行唔到，總之就係一時黑衫幫我拉裙，一時又橙衫幫我拉裙，而橙衫一拉裙就會踩到我條裙。 我地準時開始，八點已經食緊，初初上菜好快，後期好慢，上完魚之後停左好耐，食到11點幾，中間我地只因為敬酒，要求過一次停菜。但老實講，食物比想像中差，但好食過其他地方。乳豬比起試菜既時候有出入，因為試菜既時候我好記得佢哋係片走晒啲白肥肉，一啲肥都無，好乾淨！但係當日就片得唔夠乾淨，而如果我哋主家席都留意到既話，即係預咗賓客都唔會片得好乾淨架喇。鮑魚ok既，其他都okay。我地試菜同佢地講邊啲鹹，邊啲淡，佢地最後都係有做到。 建議新人要了解temporary staff 有幾多人，同埋一晚有幾多人serve。要問清楚係一對幾多檯，起碼一個人睇一圍臺。同埋要清楚當晚既流程。酒水、麻雀、泊車幾多小時，要同酒店傾清楚。因為酒店6點半後先有泊車優惠，佢哋話酒店本身車位少，我地又早開始，所以用唔到。