之前有朋友用過Anovia啲衫，都話佢啲衫幾靚，所以我都揀番佢。我係直接上佢公司嘅，之前都有打去預約先上去。銷售期間係會有一位同事阿雪serve我哋，又唔會話好hard sell咁，佢都會問我total大概想要幾多件衫呀，可能係送客﹑敬酒﹑迎賓咁樣，又或者有啲人淨係要敬酒嘅，就唔要送客嗰套。其實我係結婚年半前就book，可能中間有時我有啲嘢唔記得咗，例如個package包啲咩呀嗰啲，咁我打番去問阿雪佢都好細心咁解答番我嘅。 到咗揀衫嘅時候，過程都okay，我都係睇相見到鐘意嗰啲先揀，所以唔係試好多就揀到。最後我係租咗裙褂﹑婚紗﹑送客﹑敬酒同迎賓五套，啲朋友都話婚紗最靚。我套婚紗特別之處就係佢係啲比較簡單嘅款，就唔係啲好爆好誇張嗰啲，佢係比較古典﹑修身直落嗰啲，揀好咗之後都冇轉過喇。中間我問佢final fit幾時方便，佢都會話「我哋嚟緊六月有啲新貨喎，不如你等埋啲新貨先一次過上嚟啦，睇吓會唔會轉啦。」，之後我都有番上去再睇，亦都有兩套轉咗嘅。 攞衫嗰日我係同姊妹同先生一齊去，留咗deposit攞埋衫就可以走喇。佢啲衫都好乾淨企理，都聽過朋友話有啲舖啲頭紗可能會好黃，但係佢啲頭紗都好白淨嘅，非常之好。最後我著上身都覺得非常fit，唔會話突然間窄得滯又或者鬆得滯咁。到咗還衫嗰陣，我係有整污糟少少，不過佢都冇收我錢。 不過，佢哋個deposit真係幾貴，要成三萬五。我問佢三萬五點計，佢就話係套褂三千，其餘都係八千。我問過啲朋友佢哋去開嗰啲嘅deposit都冇咁貴，老實講，買埋套衫都未必需要呢個價錢。 我個package原本係有六套衫，係有一套男士嘅tuxedo，不過我先生喺第二間租咗，我就轉咗要飾物。成個package就此$12500，個deposit同個package個價好似唔係好成正比咁。我諗金額呢樣可以再調整吓，因為萬一到時有咩損壞嘅時候，收八千蚊一套可能就真係貴咗少少喇，不過其他都冇咩大問題。