其實間酒店整體係okay嘅，不過就係有啲串，特別喺婚展既時候你會感覺到佢哋嗰種高傲，真係好似「你地咪唔好book囉，我地都唔憂做！」咁樣。例如佢哋係有包喜帖既，但係一圍得八張帖，咁啲長輩即刻嘈啦，俾到十張又唔得話最盡都係得八張，佢地都企硬，唔夠就要同佢地買，當然呢個就係我嘅感覺。之後我都冇再拗呢樣野，去到印帖同佢講番我都係要三十圍要幾多張，佢都好爽快俾到三百張我，我地最後冇講個好大嘅數，所以佢地都即刻okay。 啲staff都係效率高同埋好醒嘅，當日燈光場地音響等等都好好，我就係鐘意佢地呢樣，個場真係好靚。食物就中上啦，因為我食嘅時候都凍咗，人地講番都話好食，不過又未聽過「哇好好食呀」咁嘅comment，不過都冇人話難食嘅，酒店服務都係okay嘅。 埋單嗰度有啲小插曲嘅，個晚個尾數係大概10萬，咁我就同男朋友一人碌啲，點知佢就碌錯卡，總之就好低能！嗰日個尾數有四毫子，佢碌咗五萬蚊後來發覺原來冇碌嗰四毫子！於是佢就void咗張單再碌過，之後佢話︰「void咗張單之後又碌唔到喎！」後尾就話不如打去card centre，其實當時都好夜差唔多十二點，碌唔到我地又唔想退讓，因為我想儲分喺嗰張卡呀嘛。當時我地都好攰，咁打咗一輪電話，好耐都搵唔到銀行既staff。總之就搞咗超過半個鐘，而後來酒店都有話送番支酒俾我地，都算好識做而大家都冇鬧交嘅，態度都okay。我地都問佢咁夜會唔會搵唔到銀行 staff，而都真係太夜太攰，而且錯不在我地，咁我就話︰「其實我哋今晚響度住都未走啦，可唔可以聽日先碌？」之後佢又問咗個senior，嗰senior 又話唔得，咁我地就唯有喺個ballroom度焗坐。其實嗰staff自己都好驚佢放工冇車走，因為我結婚之後嗰日係渣打馬拉松，都幾麻煩。 後來打咗超過半個鐘終於都搵到HSBC 個 staff，HSBC 話唔俾碌因為同一張卡碌咗兩次！我心諗點解會碌咗兩次呢？原來10萬我想分開一人碌五萬，酒店居然同一張卡碌咗十萬！所以其中一次爆咗limit就碌唔到，呢個又係佢哋另一個 careless mistake。不過點都好啦，搞咗咁耐我哋都冇點怪佢，話大又唔係大事，而見佢哋都唔想又都有送支酒都都算係咁，當有補救啦。