Match Chan係我朋友嘅friend嚟，都睇過佢拍啲片。之前我地去睇婚展，諗住方便可以一間搞晒，就join咗間一條龍服務嘅公司，包埋攝影。婚展嗰度都會俾你睇吓啲片拍成點，我地睇咗啲片就唔係話特別ok特別差，正正常常咁，個價錢都吸引嘅。我地又join埋個即影即有相咁啦，後尾都俾晒錢架喇，之後幾個月後再諗我老公就好驚，因為結婚拍攝係一次性架嘛，拍得好唔好係之後先知架嘛，要自己去搏。睇完Match Chan 佢地啲片起碼係有信心啲。後尾老公就驚話不如轉啦，佢就覺得揀衫揀唔到反而仲可以去搵，但係攝影係冇得搏嘅，到嗰一刻拍晒你先知。 我地本身都知有Match呢個人嘅，但係join嗰間一條龍公司嗰一刻就冇諗過，係俾晒錢番轉頭諗佢就開始驚喇。我地問番Match攝影係點安排，佢就話可以揀三四或者五個人嘅，我另外join咗嗰間係得三個人，一次得六個助手，Match就建議我地四個係最好。佢係專業同埋我地睇過佢嘅相，都起碼有信心啲先啦。 Match係負責攝錄，另外有其他人負責攝影。Match聽到我地揀過另一間反應都冇話唔好嘅，因為佢知我地原因係咩，就係擔心嗰個攝影，佢知道我好信佢，後尾佢都有幫我地諗睇吓可唔可以兩邊攝影師夾吓，睇吓到時點夾，因為攝影同助手全部都要夾，唔係就好難影。佢就建議一邊影snapshot，其他就俾Match搞，我地都唔識，信晒Match。到最後結婚前一個禮拜，嗰間公司先同我講話攝影師話好難夾，佢地就決定退錢俾我地喇。一個禮拜內Match都即刻幫我搵番即影即有相。 當初同Match傾都係透過電話，我覺得都唔需要見面。而Match喺有需要嘅地方都會主動提出建議，我亦都信佢專業眼光。聯絡過程中，佢都問我地有咩要求，我地都話冇咩特別要求。成長片段嗰啲佢整完都有俾我地睇過，我地有啲嘢執過佢又幫我地執番。 Match嘅攝影風格係natural啲嘅，睇番段片係好多角度都好自然，所以佢冇特別刻意叫我地做啲咩嘅。我地都鐘意自然啲，刻意反而會硬綁綁咁。睇番Match段片我先生都好鐘意。歌方面佢都有問我地，俾啲歌我地揀嘅，段片我地就由佢決定，反而成長片段我地就揀咗。佢首先問我地有冇特別歌想要，我地就話冇，之後佢俾幾首我地揀都揀到。 Match有叫我俾個rundown佢，想幫我地夾得好啲。好似班攝影師如果要佢地八點前嚟係要俾OT，佢有提過我不過俾個rundown佢幫我執吓，睇吓可唔可以幫我慳少少錢。我地係擇吉時出門同去男家嘅，啲時間就排到好早。第一眼Match一次到就話︰「好早喎！」佢就試吓可唔可以幫我地執，因為佢知道影相時間需要幾耐。我有好多次做姊妹經驗，都知rundown係有遲冇早嘅，我地都盡量執，到咗嗰一日真係好鬆動。我預多咗時間俾斟茶，Match就話嗰度可以唔洗咁鬆動，緊少少都得，咁就唔洗咁早嚟。一來慳到時間，二來又唔洗俾咁多OT錢。嗰日真係夠晒時間，仲有早添。我覺得呢一點係幾好，佢會幫你睇rundown又肯幫你慳。 段片真係拍得好感動，我睇到喊，到一兩個月後睇番都會喊，我都有share番條link俾朋友睇，佢地都話好感動。特別係老爺奶奶媽咪最感動，訂婚嗰陣佢都有影，氣氛好正! 整體仍地俾到我地嘅嘢都okay。我有啲朋友嘅攝影師會做埋大妗嘅角色，反而佢地係冇嘅，朋友啲婚禮當時氣氛都幾好架原來，最後我叫咗伴娘講，如果佢地識講埋就係bonus喇！