我哋係Mira度擺酒，不過其實confirm咗之後我哋都有少少擔心，因為中間佢哋轉過sales team嘅同事，有一段時間佢哋條team唔係太stable，有舊同事走又有新同事嚟，變咗有唔同人follow up我哋big day，但好在最後到big day嗰日都好好。起初我哋驚會亂，或者之前同事交代得唔足，唔知道大家要求係點樣。但好彩嘅係到最後follow up到尾嘅同事Sarah最後嗰段時間好幫忙好落力，同埋佢哋operation嘅同事好experienced，所以嗰晚都好smooth嘅。Sarah同埋佢哋當晚負責in charge banquet嘅同事都好好。 Big day嗰日，酒店會安排一位同事照顧新娘，嗰個同事好細心，同埋會一路提點我要做啲咩，又幫我照顧睇下啲衫同accessories有冇問題。另外，我個banquet比較多圍數，好多人要影相，佢哋有好多同事喺台側邊stand by，頭先跟住我個同事就一路扶我上上落落，側邊個in charge又會喺度，啲同事又喺度，佢哋好幫得手嘅就係一見到多人上去影相，佢哋就不停咁幫手擺好啲櫈。佢哋人手係好充足，因為有時去宴會你見到點解影相嗰度好似好亂，要好耐先set up得到，分分鐘要自己搬或者排位，但係當晚就完全唔需要擔心呢樣嘢，佢哋好快手。一見到你多人上去影就即刻拎哂啲櫈上去，一影完就即刻拎返開啲櫈等你可以影下一組相，呢一點我係覺得喜出望外。我諗主要係因為佢哋人手好充足。其他賓客comment都覺得個場幾好，啲嘢食都幾好。 如果事前嘅溝通同follow up可以緊密啲就比較好，因為可能咁啱我嗰時佢哋係好多交接，變咗未必follow up得太足。但係到最後佢哋都做返足，我諗如果佢哋條team都夠同事，可以早啲做preparation，做多少少。