我原本已經識Viwa Production裡面其中一個人，平時成日都係社交平台見到佢幫人影啲結婚相都影得好好，所以到自己結婚都好快決定搵佢地影。第一次見面我哋大約話晒俾佢哋聽我哋預定嘅日期，佢哋就了解吓我哋嘅性格，聽吓我哋呢pair人嘅故事之中有咩特別嘅片段。第二次上去佢哋就同我哋傾吓佢哋有咩idea，細節上會點影同埋價錢。我覺得佢哋都有就住我哋嘅性格特質咁plan，亦唔會hard sell。收費都好清楚，一個費用就包晒啲嘢，有個List講明有咩，無隱藏收費。只係因為我哋用銅鑼灣Crowne Plaza嘅婚宴場地橫跨2層攝錄，要拉長啲線先額外加咗啲錢。同埋我哋係要西餐buffet而唔係中式婚宴，唔會一圍圍敬酒同埋預計唔會好多時間企喺度影standard photo，就請咗2個攝影同2個錄影可以分開跟我同我老公，幫我哋捕足吓我哋同朋友一齊飲吓酒食吓嘢嘅snap shot。 嗰時我哋8月先考慮結婚，12月就結，所以搵得佢哋都幾急。我哋一次過就已經confirm晒佢哋prewedding同big day，可以一次過搞掂唔使煩咁多嘢。我哋影完prewedding已經覺得佢哋影得好好，大家又夾到，所以合作完都對佢哋好有信心，信佢哋嘅專業。其實傾完細節之後，都好急要為之後嘅Prewedding相同早拍晚播揀歌，因為佢想預知道用咩音樂，可以影相嘅時候去配合返。真係好少有反而俾佢催我快啲揀，而唔係新人自己著急。雖然話佢催我，過程當中都客氣，佢有俾啲歌我聽，我自己又去搵其他黎聽下，揀出黎都滿意。 當日佢哋成隊人除咗主要嘅攝錄都有4-5個人，有人負責打燈，都好準時。之前大家傾run down時佢都有提議我哋男女家各應該預幾多時間化妝同埋要影幾耐，又問有幾多pair人要斟茶，再同我哋講大約要用幾多時間。我哋就用佢估計啲時間要留幾耐再plan整個rundown。當日啲時間都唔係差好多，所以我哋覺得佢哋時間掌握得幾好。朝早出門之後喺屋企樓下影咗啲相就去酒店。因為我要換衫就無再出去影，先生嗰邊同啲兄弟就有喺酒店附近影吓相。我諗佢哋係想條video攞多啲shot。嗰晚場地上下層都有電視，播返我哋啲相同埋朝早條片，但係我當然係無時間睇，都係之後先睇返，覺得都拍得唔錯，攞嘅角度、燈光同顏色都ok！唯一係台前影standard photo嘅攝影師無乜笑容同比較快，感覺就好似無咁nice，但其他啲crew都好nice。 婚後啲片都經網上drive收返，反而啲相就未有，因為佢哋都忙，未有時間執，佢都話希望6月尾真係俾到我。不過我自己一開始都同佢講唔急，所以可能佢就做埋啲搵食嘢先。其實一齊合作影咗2次相之後大家都熟咗，佢哋好多嘢都好似朋友咁主動幫手！