我哋大約結婚嘅大半年前開始搵場地，嗰時1月28日個期都幾緊張，唔係好多地方俾到ballroom我哋。我哋approach Mira之前有朋友有經驗用過Mira，都有好評，所以我哋去嘅時候其實都幾正面。上到去睇場同傾嘅時候覺得佢哋嘅態度都好sincere。雖然最初去睇時只係俾到3樓嘅function room，但後來check到有ballroom佢都有盡量留俾我哋。我哋大約係5-6月左右去睇場，7月頭到婚展時先正式落訂，因為婚展會有啲特別優惠，而且最最最主要都係俾到ballroom我哋。 我覺得Mira佢哋嘅服務跟得幾足，尤其sales嗰邊嘅service都幾貼身。我哋同佢傾啲當日細節嘅時候都提出咗唔少要求，佢哋都盡量滿足我。我感覺到佢係為咗我個婚宴去諗同盡力幫我去做。後期我印帖出現咗問題，佢都好快俾到啲帖我再攞出去印。然後到結婚前一日，發現可能之前同花車師傅溝通上有啲誤會，例如係車頭有無花球之類，sales嗰都好快同好主動同花車師傅聯絡傾返好，令我印象深刻。另一方面，我本身唔係好多idea嘅人，catering manager佢就俾咗好多建議我，最後覺得出到黎效果都幾好！ 唯一美中一足係喺Mira嗰邊安排唔到睇房，因為我成日唔喺香港，夾唔到時間。我記憶中 之前住過Mira啲房覺得一般，因為感覺比較fushion會覺得間房較黑，加上無機會睇房，結果就喺香格里拉嗰邊嘅海景套房出門。我諗如果sales睇場嗰日可以同房嗰邊合作得好啲，有得睇埋房就更好。另外，我有啲朋友喺外國黎參加我哋婚禮，我喺Mira幫佢哋訂咗房，同埋預咗啲小禮物俾佢哋。結果漏咗，我唯有自己去攞返再送俾佢哋。所以我覺得sales，catering兩邊都唔錯，跟得幾足，但房嗰類就有改善嘅空間。 當日我哋係擺午宴，所以我初頭都擔心setting嗰邊好早要開始唔知搞唔搞到。結果我哋想8點幾左要場，sales嗰邊都幫我哋盡量爭取到，而且佢哋又直接同decoration嗰邊傾，處理好晒唔使我擔心。食物方面當日我無咩機會食，雖然有攞走啲嘢食，但係始終同即場食味道唔同。不過我同啲賓客傾過，佢哋對啲食物都滿意。最後我哋唔係搞到好晏，未到3點啲人都散了。完全唔會有人催我哋快啲交場，時間都配合到。