我有個朋友喺Adele度影開家庭照，所以佢知我要搵攝影嘅時候就推介咗俾我地。我地第一次上去嘅時候，已經覺得佢地好肯聽我地意見，所以就決定搵佢地，仲即日落埋訂。中間溝通就因為大家都好忙，唔可以成日喺電話度傾，但係佢地回覆都係好快，有時我好夜D搵佢地，佢地都可以覆到，同埋答到我地問題。

我地影pre-wedding有室內又有戶外景。indoor喺studio，外景就喺貝沙灣同香港仔嗰邊影。因為我地係十號風球前已經落哂訂，但我地就係十號風球後一個星期去影。影之前一日呀Rae好好～自己去咗巡下嗰個地方仲影唔影到相，transport上可唔可以入到，使咪轉場地之類。全部都係佢自己主動同一手一腳去做，好細心，我地係好impressed！

我地租衫、同試衫都係搵佢地。我自己本身係偏瘦身型，都諗住只係試某啲款式，但佢太太Frances一見到我就叫我唔好規限自己，想試D咩衫就去試。佢地嗰度有好多款，古典或者大露背個啲都有。佢地唔會似D大店咁限制住只可以試幾多件，變咗我真係可以試到邊款先啱自己style同埋stand out到。我真係試咗好多好多件之後，最後就揀咗tube款，我覺得真係啱自己～我覺得同佢地溝通上係好好，會令到我好敢去講自己想要D咩。我去試衫個日，帶咗D accessories，Frances會好直接話唔襯，叫我帶返自己帶開嘅嘢，我覺得佢地俾D意見係好有用同埋好真誠，真係一D真正幫到你enhance個look嘅意見～

男裝方面都有好多嘢揀，我地本身都係好創新嘅人，所以Rae就建議我先生揀粉紅色，可以誇張D，試落都好啱！佢地嗰度仲有好多bow tie又refer咗我地去一間舖買著喺入面嘅shirt，都係好好。

當日影相，佢係好有耐性，我自己唔係D好女性化嘅人，但佢好好咁慢慢教我，同埋當日佢都有多一個助手嚟幫手遞下風扇之類。佢地studio雖然個地方偏細，但係五臟俱全，有一個白色牆，可以影D韓式style，又有一邊有窗，可以影D earthy D、 有陽光嘅相，都係好好。

我覺得佢地不論係啲相、衫同服務都好好，會認真俾到好有用嘅意見我地，又會好用心去幫手，所以我真係好滿意佢地，pre－wedding影完都搵埋佢地big day攝影！