工作需要成日都有機會去唔同酒店，所以到自己結婚嗰時已經有幾間心儀嘅場地，我哋去咗幾間紅磡，尖沙咀區酒店度睇過，不過都係覺得Crowne Plaza啲服務特別好，性價比高得嚟真係態度好好啲。

Sales Team嘅Alexis好有禮貌，睇場嗰日問佢package啲details，佢就逐樣介紹返，都講得好詳細。之後我哋都有好多其他嘢問都回覆得好快，好記得當我哋要交第三期訂嘅時候，我哋就諗住申請一張新嘅信用卡去賺回贈，不過後來張咭就遲咗好多先批，咁Alexis都知我哋想等埋張卡而佢都好flexible，真係等到我哋有卡先俾錢，既唔會催我俾錢又可以咁彈性處理真係非常好！

我哋其實好想結婚可以有露天證婚，而Crowne Plaza 嘅草地我哋真係好鍾意，其實當日我哋book嘅時候都有講明個risk，話如果婚禮當日天氣唔好落雨的話就要取消，而如果取消的話係唔會有任何賠償嘅，當時都明白始終人哋準備好晒啲嘢好難話天氣唔好取消而唔計錢，所以都照book啦！點知到我哋婚禮當日天氣真係落雨🌧，所以都知道無得賠，不過我覺得如果可以退返少少錢或者換做少少其他嘢就當然會更好啦，不過唔得都明嘅～ 👌

到咗晚宴，當晚service嗰邊嘅Jeremy真係好幫手。當晚有一枱無嚟，佢都好用心幫我安排返好晒啲人俾我哋減一圍，而其他招呼客人酒水服務嗰啲都真係一啲都唔使我哋擔心。食物嗰度我外父就有少少意見喇，事關我外父自己係做海鮮生意嘅，佢哋對條魚係好有要求所以我哋就upgrade條魚做東星斑。雖然話加咗錢，但係我哋都無真係expect條東星會點樣特別好㗎喇，不過外父同佢嗰班朋友始終係做呢行，真係食得出條東星本身個grade，佢哋就話都okay，不過質素都唔係特別高嗰啲，都只係一般般啦，而我自己屋企嗰邊就唔係好食得出分別喇😅。

當日服務都好好，合符我嘅想像同期望，即使係每枱嘅送餐員都好有禮貌。幫我老婆嗰個小助手都好貼心，一見有需要就即刻衝過嚟，又好主動幫佢攞住裙尾，都好幫到手。我哋唔要4小時花車個服務，佢哋嗰邊都offer轉成1間客房，可以俾我喺國內嚟嘅親戚住。我覺得整個過程溝通都好好，佢哋會盡量滿足我哋嘅需要，very good!