我哋一開頭都係諗住搵旺區，尖沙咀個啲，但係都好似未係好啱，一係就價錢唔太啱，一係就個場地唔太靚，所以都無揀到啱，就去婚展睇。去到婚展，就見到麗豪酒店，因為我哋兩個本身都係住沙田區，所以就過去睇下，咁就認識咗Phoebe，佢介紹啲package 同埋餐單，都係好吸引㗎！同埋又係酒店，感覺就係可靠啲，咁同埋價錢都係算平。

我哋本身想搵都係樓底要高，我哋開頭諗住擺35圍，所以要嘅空間都大，同埋唔想同人share嘅。我哋之後就去咗麗豪度睇，而佢哋個樓底都係好高，同埋個空間感都係偏多，同埋覺得佢嘅菜色真係同出面無得比，地點又咁近我哋兩個，菜色又咁好，所以我哋都好快就決定咗揀佢哋。 Phoebe 係非常細心，佢真係會俾好多advice我哋，又會話，你哋都住咁近，如果有時間就係沙田到行埋個大運喇。同埋餐單上本身有啲嘢係fixed咗，佢又會俾建議我哋，揀啲咩會體面啲、大體啲。佢都有俾佢contact我，基本上一日內，佢都會俾到個答覆我，仲要係好詳細嘅！ 中間我哋有時都係不斷有變動，同埋決定唔到嘅位......因為我哋想用兩邊通道march-in。如果擺33圍就會短啲，32圍就會長啲，我又想行長啲，但又想擺33圍。係呢啲位裡面，佢都會俾返建議我哋，照擺返32圍，加多啲位係某幾圍度，就會成個場空間感大啲，唔會得失啲長輩。好多嘢都係度呢度去時，佢都會幫我哋諗好。

到咗當日，佢都有落呢睇個場，有跟下，好盡心💖。同埋當日啲服務生都係好好，好醒目👍🏻✨。 我哋都有問返啲賓客嘅feedback，佢哋都話雖然麗豪就唔係新㗎喇，外牆就唔太討好，但係入到去所有嘢都好好，佢哋都好正面。 同埋我覺得啲嘢食同出面真係有分別嘅，之前係出面食個啲又好細碟同埋啲嘢食都真係唔掂㗎！但係我食過個啲嘢食都係熱騰騰咁樣上，我哋打包咗啲嘢食，個翅都真係好好食😋，同普通個啲都真係好唔同🤗。