嗰陣係喺google search wedding MC就搵咗一個商台嘅團隊Wedding MC，咁Joe就係其中一個成員。一開始就見到個老闆嘅聯絡方法，就同佢講我邊日要mc，佢就send咗6個候選人同埋啲片睇吓。佢有分2,000蚊同3,000蚊嘅，咁嗰陣我就覺得MC係需要嘅，但又無咁多budget，所以揀咗平啲嘅，同埋Joe同我老公嘅身高差唔多，所以唔洗驚會搶我老公風頭😂😂😂

係決定之前就同佢傾咗半個鐘電話，傾吓啲流程咁。當時就覺得佢口才都幾好同幾清晰，所以就直接比咗一半訂。喺bigday前一個月就出嚟傾吓rundown，比較特別就係佢自己做開中式mc，但我自己係西式嘅，咁都幾require mc講多啲嘢。事後問返啲賓客都覺得佢講得幾好，例如cue 4大長老嗰陣，都無冷場。

係唯一一樣就係因為我個場有鏡頭直播，佢會成日唔小心遮住個鏡頭，不過Joe嘅優點就係應變能力好。話說當晚我老公準備咗彈琴比個驚喜我，但個琴譜就比人拎走咗，Joe啲應變能力好強，即刻interview我去拖時間，最後等我老公搵返琴譜先停，同埋佢問嘅問題都係好有sense，唔係亂問。加上佢同酒店head waiter都配合好好，唔會太快唔會太慢，會適當時拖返慢個速度，好識睇氣氛去執生！

不過有少少位可能要改善就係啲姊妹覺得佢太過over control個rundown，但其實我自己係覺得ok嘅😊因為出到嚟個效果都好好，所以我無介懷，但可能會有人會介意，但真心嚟講除咗佢本人有少少長氣，同埋同賓客嘅交流可以再做好少少之外，其實已經好好！