我喺好耐之前都已經知道Lost Stars架啦，因為好多朋友都會去嗰度飲嘢，我搵場地都搵得急，朋友先提我Lost Stars都有得搞婚禮。我一開始係想搵啲casual啲嘅地方，但係要照顧屋企人嘅飲食需求，酒店嘅價錢又偏貴，見到Lost Stars都覺得佢哋有個舞台好正，就揀咗佢哋啦😆。因為我都係做舞台劇嘅，就睇得出佢哋嘅音效燈光同出面嘅分別，老細又幾啱傾，感覺氣氛都好好。喺傾嘅時候佢哋都好易話圍，菜式同場地佈置佢哋都任我整，唔會好似酒店嗰啲咁多限制。不過佢哋嗰度係唔方便泊車嘅，要去到隔離棟樓先泊到，但係佢哋都儘量幫我哋喺樓下留咗三個車位，俾新人嘅車泊。佢哋仲要送咗份神秘禮物俾我哋，原本個package係包live band嘅，但佢哋有特登請咗我哋比較熟悉出名少少嘅歌手，因為之前傾嘅時候提過佢哋就默默記住咗，都好細心🥰。但係嗰日都有啲小阻滯，因為我哋請咗around 140人，影group photo嘅時候就會難影啲，最後要大家企到好逼先影到，不過我哋都接受到嘅，但其他新人可能就未必接受到啦。水吧嗰度啲嘢飲都出唔切，可能因為我哋係佢哋嗰度最多人嘅一次婚禮，人手安排就無咁好。唔多老人家或者冇咁傳統啲嘅新人就會適合啦🙈。