我自己係做婚禮呢行嘅，成日出job都會睇到㗎啦，咁就覺得Crowne Plaza個場都好靚，無柱又四四方方咁，香港無柱嘅酒店都唔多，所以我都無乜再睇其他酒店，就直接揀咗佢啦😊。跟開我嘅Sales Alexis都係人哋介紹俾我嘅，因為話佢follow得好，咁我就直接搵佢。佢都有好詳細咁同我講解，叫我諗下再決定，都唔會好hard sell，但因為我真係好鍾意個場，所以就直接book咗啦。過程中我哋都會keep住聯絡，有咩問題搵佢佢都會即刻答我，叫我有咩需要就同佢講，會跟得好貼。去到big day嗰日，我返酒店嗰陣佢都已經喺度等緊我，同埋有個跟我嘅bride assistant都好好。我做婚禮呢行都成日見啲新娘結婚㗎啦，見人哋咁緊張，估唔到自己去到嗰日都會咁緊張，之後個assistant都會提我唔好緊張，又會斟水俾我飲攞嘢俾我食，等我可以安心啲🥰。同埋其他酒店見開都無佢哋跟得咁足嘅，覺得呢間都好好。除咗個bride assistant，仲有個處理其他嘢嘅Charles都跟得好好。我嗰日本身係plan喺空中花園訂婚嘅，但因為驚會落雨，所以都有同佢哋溝通過如果落雨點算，咁佢哋就建議如果落雨就可以搬返落ball room嗰度行禮，都會幫我諗埋呢啲嘢。去到嗰日佢哋都有幫我睇住天氣如何，無問題就可以照run。本身酒店係唔俾人擺candy corner出去嘅，因為有其他人book個場嘅話就要同其他人share個ball room。就算酒店嘅規矩本身唔俾，佢哋都幫我睇嗰日有無其他人，無人嘅話就可以俾我擺過啲啲，即係都會諗辦法俾到我想要嘅嘢。我係喺佢哋嘅空中花園證婚，夜晚晚宴同big day嗰晚喺嗰度過夜，佢哋都會送返啲嘢上房俾我哋休息。我擺咗三十幾圍，佢哋個ball room都容納到，floor plan最多仲可以擺到四十圍，咁大又無柱仲難搵啦。嘢食方面，我之前都有聽人講佢哋啲嘢食係偏鹹嘅，咁我都有事先問佢哋到時可唔可以同廚師調整下，咁佢哋都即刻幫我搞掂，最後賓客都讚啲嘢食好食。我都會介紹Crowne Plaza俾其他新人朋友，我覺得追求性價比高嘅新人就最啱佢哋啦👍🏻。