一開始揀酒席嘅時候就見到喺尖沙咀新開嘅海港薈，去睇過覺得好啱我哋心水，裝潢好新，夠闊落夠光猛，新娘房又夠大，仲可以望到海景，成個package就算唔額外佈置都夠用😍。溝通嘅時候佢哋唔會hard sell，係一問一答咁，介紹清晰又解答到我嘅問題，所以最後就揀咗喺佢哋嗰度擺中式晚宴嘅酒席啦😆。

Big day當日都有個assistant全日跟住我，影相嗰陣會幫我整下個裙擺，我突然要敬茶嘅時候又會即刻過嚟，好細心，會提醒我好多嘢🥰。但係當晚因為有社會運動，我哋唔夠時間執走場地嘅所有嘢離開。佢哋好好，都考慮到呢個因素，俾我哋第二日晏晝之前去執好，交到場俾第二晚嘅party就得。賓客都讚個場地靚，服務又好，嘢食有翅同龍蝦，真係好滿意啦。如果想擺中式婚宴嘅新人可以考慮下海港薈啦，午宴晚宴都好適合，因為我之前晏晝去飲過茶，啲自然光照入嚟仲靚過夜晚，天氣好嘅話真係完美啊🥳。